RDRMC-7, hingtungdan ahensya sa gobyerno alerto na sa posibleng epekto sa dautan nga panahon

By Amorganda A. Saludar

CEBU CITY February 17(PIA) --- Ang Regional Disaster Risk Reduction and Management Council (RDRRMC-7) ug uban pa nga mga hingtungdan ahensya sa gobyerno nakamugna og ilang kaugalingong mga pamaagi ug pre-emptive actions taliwala sa hulga sa Low Pressure Area nga posibleng mosulod sa nasud sa Pilipinas.

Basi sa ulahing taho sa PAGASA aduna’y nasigpatan nga Low Pressure Area ug kini gibana bana nga kini nahimutang mga 1, 200 kms east of southeast of Southern Mindanao ug kini gipaabot nga mosulod sa nasud sulod sa 24 ka oras. Sa kasamtangan ang sidlakang bahin sa nasud nakasinati na sa gitawag og easterly winds.

Gumikan niini ang buhatan sa Civil Defense (OCD-7), ug mga probinsyal nga buhatan niini ingon man uban nga local DRRMCs, CENTCOM-Operation Center, ug PNP-PRO-7 OPCEN nagbaton na og ilang tagsa tagsa ka mga records sa mga ulahing weather advisories aron sila makamugna gilayon ug ilang kaugalingon nga pamaagi og mga pre-emptive actions sa posibleng dautang epekto unya sa bati nga panahon. 

Ang mga Barangay Disaster response teams nihimo na usab og mga warning notices ngadto sa mga lugar nga sagad bahaan. Ila na usab nga gipalihok ang ilang tagsa tagsa ka mga Search and Rescue teams samtang ang mga local nga DRRM Councils nilihok usab aron pag monitor sa mga sitwasyon sa ilang tagsa tagsa ka mga lugar. (mbcn/AS/PIA-CEBU)