DENR 7 malapusong sa pagsukod ug paglatid sa mga utlanan sa mga kalasangan sa Central Visayas

CEBU CITY, Feb 18 (PIA) -- Ang buhatan sa Department of Environment and Natural Resources (DENR)-7 maplampusong nakompleto ang pagsukod ug paglatid sa mga untlanan taliwala sa mga kalasangan, parke ug mga umahan sa Central Visayas kung diin mikabat kini ngadto sa 8,838.355 ka kilometro.

Gipahigayon kini human natukod ang Regional Assessment and Delineation Teams (RADT) ug ang Land Evaluation Party (LEP) niadtong tuig 2008 aron sa paghipos sa mga gikinahanglang datos, imbentaryo, mga mapa ug uban pang mga impormasyon nga gikinahanglan sa DENR-7 kalabot sa mga kalasangan, parke ug mga umahan sa CV.

Matud ni DENR-7 Regional Executive Director Maximo O. Dichoso, mikabat sa 8,838.355 ka kilometro ang malampusong nakompleto sa grupo gikan sa upat ka mga probinsya sa rehiyon 7. Sa kinatibuk-an, 3,184.83 ka kilometro (km) ang anaa sa Sugbu o 36.03 %, 2,880.029 km sa Bohol o 32.59 %, 2,536.685 km sa NegOr ug 236.811 km sa Siquijor.

Gisugdan sa buhatan kining maong proyekto niadtong tuig 2000 subay sa Sec. 4, Article XII sa 1987 Philippine Constitution nga nagmando sa pagdeterminar sa mga limitasyon ug utlanan sa mga luna nga gipanag-iya sa gobyerno.

Matud ni Dichoso, importante ang pagsukod ug paglatid sa mga luna alang sa tumong nga paghatag ug mas lig-ong mga programa nga magprotihir sa kalikopan ilabi na ngadto sa mga giilang protected areas ug national parks nga nahimutang sa lain-laing lugar lukop nasud. (mbcn/PIA-7 & CTU/Maryknoll B. Lague)

==========

Asosasyon midunar ug mga boxing gears sa dakbayan sa Dumaguete

DUMAGUETE CITY, Feb. 6 (PIA) -- Ang kagamhanan sa siyudad sa Dumaguete bag-o lang midawat sa donasyon nga mga boxing gears gikan sa Amateur Boxing Association of the Philippines (ABAP).

Si ABAP Executive Director Ed Picson maoy nangunay paghatag sa tulo ka pares sa mga boxing gloves, headgear, corner post ug uban pa atol sa gipahigayon nga turn over ceremony niadtong Enero 30, 2012.

Ang Sports Consultant sa dakbayan Jose Guirit, mipadangat sa ilang dakong pasalamat ngadto sa asosayon ug namahayag nga kining maong donasyon nagpakita sa lig-ong suporta sa ABAP sa industriya sa boxing sa siyudad ug sa kinatibuk-ang probinsya sa NegOr.

Kahinumdoman nga ang dakbayan sa Dumaguete maoy nangulo sa championship games sa boxing event dinhi sa kabisay-an nga gisugdan niadtong Enero 4 hangtod Enero 30, 2012.

Matud sa mga tigpamaba sa dakbayan, ang mga gideklarang mananaog atol sa maong kalihokan maoy morepresentar sa kabisay-an atol sa national finals nga ipahigayon sa Tagbilaran, Bohol karong umaabot nga buwan sa Marso. (mbcn/PIA & CTU/Maryknoll B. Lague)

==========

Libreng surgical mission alang sa mga pasyenteng bungi ipahigayon sa Bohol, 20 ka mga bakante gitagana alang sa mga pasyente sa Siquijor

SIQUIJOR, Feb 18 (PIA)—Ang probinsyal nga kagamhanan sa Siquijor mianunsyo nga usa ka grupo sa mga doktor gikan sa Estados Unidos ang mobisita sa siyudad sa Tagbilaran, Bohol alang sa usa ka surgical mission alang sa mga bungi, ilabi na sa mga batang pasyente.

Si Officer-in-Charge Provincial Director Kenneth S. Kilat sa buhatan sa Department of Interior and Local Government (DILG) sa probinsya namahayag nga adunay gitagana ang grupo nga 20 ka mga bakanteng pwesto alang sa mga pasyente nga naggikan sa probinsya sa Siquijor.

Ang maong surgical operation ipahigayon karong umaabot nga Pebrero 19 hangtod 24 sa Borja Family Hospital sa siyudad sa Tagbilaran, Bohol.

Libre ang maong serbisyo ug abagahon sa grupo ang mga panginhanglan atol sa operasyon.

Ang kagamhanan sa probinsya sa Siquijor pinaagi ni gobernador Orlando A. Fua uban sa pipila ka mga opisyales usab ang mogasto sa pletehan sa mga pasyente gikan ug pauli sa ilang probinsya. Lakip na usab nga tubagon sa probinsya ang mga balayranan sa board and lodging sa mga pasyente atol sa ilang pag-estar didto sa siyudad, dugang pamahayag ni Kilat.

Ang mga mapiling pasyente gikinahanglang moabot sa siyudad sa Tagbilaran sa Pebrero 18, walay hilanat, ubo ug uban pang gipamati sa lawas.

Alang sa dugang pang mga pangutana, mamahimong mobisita sa opisina sa gobernador sa probinsya nga nahimutang sa Provincial Capitoll Building, Siquijor, Siquijor o motawag niining mga numero (035) 344-2015, ug (035) 344-2251.(mbcn/PIA-7 & CTU/Maryknoll B. Lague)