Cebuano News: GSIS-7 makig-partner sa mga info officers sa mga lungsod ug siyudad sa Sugbu

By Amorganda A. Saludar

CEBU CITY February 21 (PIA) -- Ang Government Service Insurance System (GSIS 7) nipakita og interes sa pakigtambayayong sa Cebu Association of Citi and Municipal Public Information Officers (CAOCAMPIO) sa paghatod og mga importante nga kasayuran ngadto sa publiko.

Kini ang gibutyag ni GSIS-7 assistant regional manager Atty. Mercedes VPE Enriquez atol sa gipahigayon nga binuwan nga panagtigum sa CAOCAMPIO didto sa Lapu-lapu City Hall.

Si Enriquez sa samang higayon misubay sa mga serbisyo nga ilang gitanyag, mga benipisyo, mga tagdumala ingon man ang vision ug mission sa ahensya, ug ang mga bag-ong teknolohiya nga ilang gisagop sa paghatod ug serbisyo ug kasayuran ngadto sa ilang mga miyembro.

Gidayeg usab ni Atty. Enriquez ang matag information officer sa mga siyudad ug lungsod sa Sugbo nga midawat sa obligasyon isip tulay sa kasayuran gikan sa gobyerno ingon man gikan usab sa pribado ug publikong sektor ngadto na sa mga katawhan sa ilang tagsa tagsa ka mga lugar nga giserbisyohan.

Dugang pa niya nga ang paghatod og mga importante nga impormasyon dili sayon mao nga mapasalamaton ang mga ahensya sa gobyerno sama kanila ngadto sa mga grupo sa CAOCAMPIO kinsa dako ang matabang sa paghatod og kasayuran ngadto sa publiko.

Sumala pa ni Atty. Enriquez nga mamahimo na lang unya nga gaan ug sayon ang ilang pagpadangat og kasayuran ngadto sa ilang mga miyembro.

Gipadayag usab niya ang plano sa GSIS dinhi sa rehiyon sa pag istalar ug GSIS bulletin board sa matag LGU diin mahipatik unya dinhi ang mga advisories, mga kalambuan ug uban pa nga mga importante nga kasayuran.

Aron sa ingon unya niini dili na kinahanglan pa nga ang mga katawhan moadto sa buhatan sa GSIS aron pagpakisayod o di kaha mo claim sa wala pa na schedule nga claimable, midugang si Enriquez.

Nipasalig usab ang GSIS dinhi sa rehiyon nga moabag sa legal nga mga issues nga naglambigit sa organisasyon o tagsa tagsa ka mga information officers kalabot sa ilang responsibilidad sa ilang mga dapit.

Sa habig sa organisasyon si CAOCAMPIO President Florito “Carlo” Dugaduga nisaad usab nga makigtambayayong sa GSIS sa pag-edukar ug paghatod og mga kasayuran ngadto sa publiko kabahin sa ka importante sa GSIS ingon man sa mga serbisyo ug benipisyo nga gitanyag niini ngadto sa publiko. (mbcn/AS/PIA-CEBU)