RDC-7 giaghat sa pagpadala ug dinali-ang hinabang alang sa mga biktima sa linog sa NegOr

By Amorganda A. Saludar

CEBU CITY February 17 (PIA) --- Ang Regional Development Council (RDC-7) Chairperson ug Mayor sa Cebu City Michael Rama nag-aghat sa mga sakop sa RDC dinhi sa rehiyon nga mohatag og dinalian nga ayuda ngadto sa lalawigan og mga lungsod sa Negros Oriental nga grabeng naapektohan sa niadtong 6.9 magnitude nga linog niadtong Pebrero 6.

Pinaagi sa RDC Memorandum Circular No. 02-2012 ang tanan nga sakop sa Central Visayas Regional Development Council gimanduan sa paghatag og hinabang ngadto sa mga Local Government Units (LGUs) sa Negros Oriental nga nahiagom og grabeng danyos sa milabayng linog.

Base sa guidelines sa maong memorandum ang RDC secretariat makig-alayon sa local nga Disaster Risk Reduction and Management Council (DRRMC) sa mga apektadong dapit sa probinsya sa pagdeterminar kun unsa nga klase sa hinabang ang labaw nga gikinahanglan sa usa ka lugar.

Ang RDC secretariat na usab ang mopahibalo sa mga miyembro sa RDC kun unsa nga klase sa hinabang ang gikinahanglan sa hingtungdan nga LGU.

Ang tanan nga mga donasyon gikan sa mga sakop sa RDC pagakuptan sa RDC secretariat alang sa pag pang-apod-apod niini ngadto sa mga apektadong LGU sa Negros Oriental sa dili pa ang Pebrero 29 ning tuiga. (mbcn/AS/PIA-CEBU)