PhilPost Cebu motanyag og serbisyo haom sa adlaw sa mga kasing kasing 

By Amor Saludar 

CEBU CITY February 14 (PIA) -- Isip pagsaulog sa adlaw sa mga kasing-kasing, ang Letter Carriers dinhi sa Cebu City, Mandaue City Lapu-lapu City ug uban pa nga mga buhatan sa PhilPost dinhi sa probinsya nga aduna’y dagkong operasyon motanyag og serbisyo ngadto sa publiko may kalambigitan niini nga kasaulogan. 

Mamahimong makapalit ang publiko og mga fresh flowers, chocolates, teddy bears ug uban pa nga mga Valentines gift items sa ubos lamang nga presyo sa mga dagkong buhatan sa PhilPost dinhi sa probinsya. 

Nibutyag sab ang PhilPost nga ilang mga postmen personal nga mohatod niini door to door ug libre alang niadtong mga items gipalit sa ilang buhatan. 

Kini usa ka adlaw nga tinuig nga proyekto sa ahensya sa adlaw mismo sa mga kasing kasing alang niadtong mga lugar nga aduna’y dakong operasyon ang PhilPost gikan sa from 8:00 am – 5:00 pm karong Pebrero 14. 

Cebu City Delivery Section Chief, Jun Satiembre nagkanayon nga kada tuig nag-anam kadaghan ang ilang mga kliyente sanglit mas barato ang ilang serbisyo kumpara sa uban, ug sigurado gayod kini nga madawat sa hingtungdan sanglit personal kini nga ihatod sa ilang mga postmen. 

Dugang pa niya nga ila usab nga gitugutan ang ilang mga kliyente nga mohatag og timeframe unsa nga takna sa Valentines Day gusto nila nga madawat sa ilang padalhan o sa ilang mga minahal sa kinabuhi ang maong regalo. 

Gipasabot ni Satiembre nga pananglitan aduna’y mga kliyente nga mopahibalo kanila nga gusto niini nga mahatod ang regalo ngadto sa iyang gustong padalhan mga sa 5: 30 hapon sanglit ning taknaa mahiabot sa balay ang padalhan niini ila gayod kini nga tumanon ug suguradohon nga tukmang takna kini madawat. 

Gitataw usab niya nga bisan wala pa ang Valentines Day ubay ubay na nga mga order sa flowers, chocolates ug uban nga mga gift items pang Valentines ang ilang nadawat diin ang tanan nga preparasyon una pa kini ideliver sama sa dekorasyon sa mga kahon diin isulod ang regalo, flower arrangements ug uban pa nga dekorasyon abagahon sa PhilPost ug sa business counterpart niini. 

Mokabat ngadto sa 30 ka mga postmen ang ipakatap aron pagserbisyo sa publiko ug sa mga kliyente niini ug aron pagsiguro nga tunhay og mamahimong on time ang tanan nga mga delivery services. (FCR/AS/PIA-CEBU)