Upat ka LGUs sa Sugbo milagda ug MOU sa Pag-IBIG para sa pabalay

by Juju S. Manubag-Empuerto

CEBU CITY, December 16 (PIA) – Ang dakbayan sa Sugbo, Argao, Dalaguete ug Balamban nga kagamhang lokal (LGU) milagda ug ‘Memorandum of Understanding’ (MOU) sa Pag.IBIG Cebu South nga sangay niadtong Disyembre 2 alang sa paghatag ug maabot nga pabalay alang sa ilang mga empleyado ug mga konstituwente.

Ang acting assistant department manager alang sa operasyon sa Pag.IBIG nga si Anthony Maglungsod, mipahibalo nga ang upat ka mga LGU nakigkumbuya sa Pag.IBIG aron makapahimulos sa bag-ong programa niini nga Group Housing Loan Program (GHLP) alang sa mga LGU.

Si Maglungsod misulti sa Kapihan sa PIA nga kinahanglan nga ang mga LGU nga buot mopahimulos sa GHLP gikinahanglan nga may yuta nga kahimoan sa mao nga proyekto nga pabalay ug luwas kini sa sabal ug pagremate.

Nagkinahanglan usab ug resolusyon sa Sanggunian niini nga mopahimulos sila sa programa, dungag ni Maglungsod.

Matod pa opisyal sa Pag.IBIG nga ang ilang matabang mao ang pag-ugmad sa yuta nga tarokan sa mga balay ug sa paghatag ug puhunan.

Sumala sa Circular numero 293 sa Pag.IBIG nga ang LGU makahulam hangtod P40 milyones kada bilding nga pinatuybo ang pagtukod o ang aktuwal nga kantidad sa bilding.

Ug ang tukoron nga mga balay anha sa patag, ang LGU makahulam sa kinatas-ang kantidad nga P20 milyones matag hugna.

Ang mga LGU sa Balamban, Argao ug Dalaguete kay motukod ug mga balay diha sa patag samtang ang Sugbo motukod ug pinatuybo nga pabalay, ingon ni Maglungsod.

Ang kantidad sa mga pabalay nga kutob sa P400,000, may tubo nga 6 porsiyento ug buwanong bayad nga P2,500. Gikinahanglan nga ang mamumuo may P6,000 nga ‘net disposable income’.

Ang mga pabalay nga sobra sa P400,000 hangtod sa P750,000, 7 porsiyento ang tubo ug may buwanong bayad nga P5,000 ug P12,500 usab ang net disposable income sa buot nga mokuha sa pabalay.

Ang LGU adunay termino nga tulo ka tuig nga kinatas-an sa pagbayad sa Pag-IBIG.

Alang sa dugang kasayuran, mahimong motawag sa Pag.IBIG Cebu South nga sangay,  sa mga numero sa telepono 415-5008 ug 415-5009. (PIA-Cebu)