'Squash bread making' gihimo alang sa grupo sa mga kababayen-an sa Siquijor

ni: Rizalie A. Calibo

SIQUIJOR, Dec. 14 (PIA) -- Baynte-dos [22) ka mga membro sa usa ka grupo sa kababayen-an sa barangay Poblacion sa Siquijor bag-ohay pa lamang makahuman sa usa ka pagbansay-bansay sa paghimo ug 'squash bread' kon tinapay nga hinimo gikan sa kalabasa.

Sumala pa ni Mario de la Pena, provincial director sa Department of Science and Technology o DOST-Siquijor nga ang maong bansay-bansay haom kaayo tungod kay ang maong grupo usab bag-o pa lamang nakadawat sa hinabang financial sa Department of Labor and Employment (DOLE) alang sa mga galamitang pangluto.    

Si de la Pena miingon nga ang grupo interesadong mokat-on ug modawat sa maong serbisyo tungod kay buot niini nga mohimo ug "vege bread" nga ilang mabaligya ug mahalad karong Misa de Gallo.

Ang DOST usab naglaum nga human sa maong bansay-bansay, ang mga kabayen-an moentra na gayud sa pagpanghimo ug "squash" kon "vege bread" alang sa lokal nga mga katawhan ilabi na sa mga kabata-an tungod kay ang maong tinapay puno sa sustansya ug makaayo sa panglawas. (mbcn/rac/PIA-Siquijor)