Nakonpiskar nga mga troso sa DENR idonar sa DepEd

by Amor Saludar

CEBU CITY December 17 (PIA) -- Ang Department of Environment and Natural Resources (DENR) 7 gikatakdang idonar sa Department of Education (DepEd) 7 ang mga gikonpiskar nga mga produkto gikan sa mga kalasangan nga nikantidad og P613, 944.24.

Ang gikonpiskar nga mga troso magamit alang sa pagtukod ug mga school buildings ug uban pa nga angay gamitan niini, matod pa sa DENR-7.

Si DENR Secretary Ramon Paje nihatag og kamanduan ngadto ni Regional Director Maximo Dichoso nga dalion ang husay niadto’ng mga kaso nga may kalambigitan niadtong mga produkto sa kalasangan nga nakuha sa illegal nga paagi, kini subay sa kasamtanga’ng direktiba nga idonar kini ngadto sa DepEd.

Ang mga ipangdonar nga produkto naglakip sa mga troso nga mahogany, gemelina, bagalunga, makaasim, sangilo ug mga piraso sa ginabas nga acacia nga mosumada og 36,593.76 ka tiil.

Gitataw ni Dichoso nga ang mga nahisgutang produkto nakonpiskar gumikan kay kuwang kini sa mga gikinahanglan nga mga dokumento ug rekitos panahon  sa pagpanghakot niini ingon nahimutang usab kini sa Community Environment and Natural Resources Offices (CENRO) sa Tagbilaran City in Bohol; ug Pamplona ingon man Ayungon, Negros Oriental.

Ang mga torso gamiton sa DepEd alang sa katukoran sa nagkadaiyang mga pampublikong school buildings, ingon man sa paggama og mga kasangkapan sa opisina, mga lingkoranan ug lamesa.

Base sa Deed of Donation gikinahanglan nga sa  matag proyekto  sa DepEd sila  mosumiter ngadto sa DENR og certificate of completion pinirmahan sa Project Engineer ingon man mga hulagway ug mga listahan sa mga produkto nga gigamit sa maong proyekto.   

Atol sa pormal nga pag turn-over sa mga torso ngadto sa DepEd imbitahon unya ang isip saksi ang Commission on Audit (COA) auditor alang sa dokyumentasyon ug insaktong accounting sa proyekto.

Gitataw ni Dichoso nga nagpadayon ang inbentaryo sa mga nakonpiskar nga mga torso aron pagdeterminar  kung unsa ang angay nga idonar aron kini  magamit alang sa katukoran sa dugang pa nga mga school buildings mga lingkoranan ug lamesa.   (FCR/AS/PIA-CEBU)

===========

APIR nga kampanya gihingusgan sa DOH-7

Ni: Juju Manubag-Empuerto

CEBU CITY, December 17 (PIA) -- Bisan ug mikunhod na ang insidente sa kadaot gumikan sa pagpabuto dinhi sa Tungatungang Kabisay-an, ang Department of Health (DOH) 7 mi-target ug siro nga disgrasya karong Pasko sa gipakusgan nilang kapanya nga gitawag  ‘Aksyon Paputok Injury Reduction’ kon (APIR).

Si DOH-7 Regional Director Dr. Susana Madarieta miingon nga ang APIR nga kampanya miduso sa ka kumpleto sa lima ka tudlo sa kamot sa paghimo ug high-five nga sinyas nga lokal nga pinulungan nga nagpasabot og ‘”appear”.

“Kasagaran ang mga tudlo sa kamot ang maapektohan sa kadaot sa pagpabuto. Gani ang uban sa kagrabe, maputlan gyod,” sumala pa sa hepe sa DOH-7.

Kwarentay siete ka mga kaso ang nataho sa datos sa DOH-7 nga nangayo ug pagpanambal gumikan sa kadaot sa pagpabuto ug ang siyudad sa Sugbo ang may kinadaghanang kaso.

Adunay 35 ka mga kaso ang natala samtang tag-unom gikan sa Bohol ug Negros Oriental. Pito niining mga kasoha kay ang mata ang naigo, sumala pa. 

“Ang labing komon nga tagsala mao ang kwitis,” ingon ni Madarieta.

Ubos sa balaod batok pabuto, ang pulis maka-imbargo lang niadtong gitino nga ginadili sama sa ‘super lolo, super thunder ug ang goodbye Philippines ’.

Ang DOH-7 midasig sa publiko nga magsaba-saba sa laing paagi sama sa paggamit ug mga kaldero, kabo, kawa, planggana, balde, lata, tororot, busina, musika o magpasiugda ug kalingawan, pasundayag, amatyur kontes o pagbutang ug luna sa ilang dapit kung asa buhaton ang ‘fireworks display’.

Apan ug dili gyod malikayan ug madisgrasya gumikan sa pabuto, si Madarieta miingon nga hugasan ang samad ug limpiyo nga tubig ug sabunan ug moadto dayon sa pinakaduol nga sentro sa panglawas o ospital para sa dalian nga pagpanambal. 

Si Madarieta miingon nga “mas maayo nga luwasnon ug kumpleto ang atong mga tudlo human sa mga holidays kaysa abi-abihon ta ang Pasko ug Bag-ong Tuig nga putol ang uban ta nga mga tudlo”.

Matod pa sa DOH-7 opisyal, ang kalampusan sa kampanyang APIR nag-agad ra gyod kanatong mga katawhan. Ang atong hini-usang pagbulig, pagtabang, pagsuportar ug pagsunod sa mga tambag sa atong mga nagkalain-laing ahensiya sa kagamhanan ug organisasyong sibiko, nagtimaan sa kaluwasan sa katawhang Pilipinhon halayo sa disgrasya ug kadautan. (FCR/JSME/PIA-Cebu)