80 porsiyento na sa drivers diri sa CV nakakuha sa Pantawid Pasada Cards

by Amor Saludar

CEBU CITY December 19 (PIA) --- Mokabat na ngadto sa 80 porsiyento o 9,000 ka mga jeepney drivers ug operators dinhi sa tunga- tungang kabisay-an ang  nakapahimulos sa Pantawid Pasada Cards hangtud Disyembre 15 ning tuiga.

Nagkanayon si Land Transportation Office-7 regional director Raul Aguilos nga sa 11,695 nga mga benipisyaryo mikabat na ngadto sa 9,000 ang nakakuha na sa ilang mga cards.

Ang mga nagkupot og mga prangkisa sa Public utility jeepney nga aduna’y balido nga rehistrasyon kinsa wala pa nakakuha sa ilang Pantawid Pasada Cards, mamahimong makakuha niini sa buhatan sa Department of Energy ug dili sa regional office o district offices sa LTO.

Gisubli pagpahibalo sa DOE nga ang mga Pantawid Pasada Cards ipanghatag kini nga libre ngadto sa mga benipisyaryo.

Ang programa nga Pantawid Pasada gitumong sa kagamhanan aron ang mga PUJ driver ug operators makasugakod sa nagkataas nga presyo sa lana.

Ang nahisgutang card aduna na daa’y sulod nga P1,050.00. (FCR/AS/PIA-Cebu)

===========

Philpost 7 aduna na’y bag-ong website

CEBU CITY, December 19 (PIA) --- Makita na sa internet ang philpost7.com. ang bag-o nga official website sa Philippine Postal Corporation (PhilPost) dinhi sa rehiyon.

Matud pa ni Philpost-7 officer Rachel Betos nga ang maong website gitumong aron pagpasilitar sa mga kabalaka sa mga konsumidor sa paspas nga pamaagi.

Gitataw ni Betos nga pinaagi sa website, mamahimong ang mga konsumidor makapangutana sa kantidad sa suwat o kureyo nga ilang gipadala, mahimo usab sila nga makapangutana sa kahimtang sa suwat nga gipadala, mamahimo usab  sila nga maka download og mga application forms alang sa  business reply permit; , postage charge account;  mamahimo usab sila nga maka kontak sa buhatan sa Philpost-7 pinaagi sa website og dili na kinahanglan manawag pa sa telepono.

 Nidugang si Betos nga ang nahisgutang website naglakip usab sa rate calculator diin mamahimo makakwenta ang mga konsumidor sa ilang balayranan diha mismo sa web. Lakip na usab niini ang track ang trace system alang sa detalyado nga mga impormasyon. 

Laing impormasyon nga makita sa website mao ang zip code alang sa paspas ug tukma nga proseso ug paghatod sa mga mail. Lakip na usab niini ang  mga balita sa mga bag-ong hitabo og kalambuan sulod sa korporasyon.

Ang Philpost natukod ubos sa Republic Act No. 7354 o Postal Service Act of 1992.

Kini gituyo pagtukod aron sa paghimo og pag implementar ug mga intensibo’ng modernisasyon ug kalambuan sa mga programa nga gitumong alang  sa kauswagan sa postal system sa nasud.

Ang Philpost naghimo og upat ka mga dagkong katoyuan aron sa pag sustenar sa mga pangnahanglanon sa nasud kabahin sa ilang serbisyo. Kini naglakip sa global reliability ug dependability; market expansion through clientele satisfaction; mutually beneficial labor-management relations; ug profit maximization through cost-effectiveness ug resource efficiency.(Translated into Cebuano by Amor Saludar/PIA-CEBU