Publiko gihangyo pagdonar ug bugas, pagkaon, sinina alang sa mga biktima sa bagyo.

DUMAGUETE CITY,  Dec. 21 (PIA) -- Ang Department of Social Welfare and Development (DSWD) niapelar sa publiko og dugang donasyon nga bugas, pagkaon ingon man mga sinina, alang niadtong mga pamilya nga apektohan sa Bagyong Sendong nga nikuso kuso sa Negros Oriental kaadlawon niadtong Disyembre 17.

Sa siyudad sa Dumaguete ang City Social Welfare and Development Office namutos na og mga bag nga aduna’y sulod nga bugas, mga de lata, pagkaon mga sinina ug giapod apod ngadto sa 21 ka mga evacuation centers sa mga barangay sa palibot sa siyudad.

Gikataho nga sukad pa niadtong miaging gabii nagsugod ang pagpang apod-apod og mga relief goods sa mga evacuation centers sa siyudad sa Dumaguete.

Apan gikinahanglan gihapon ang dugang nga mga donasyon sa bugas, sinina ug mga gamit sa kusina tungod kay  ang uban nga mga pamilya wala gayo’y nahipos nga mga sinina ug uban pa nga mga galamiton sa balay.

Ang mga donors gipahimangnuan nga mohulog sa ilang donasyon sa  CSWDO subay sa  Rizal Boulevard,tapad sa Women’s Center alang sa sentralisadong pagpang apod-apod sa mga relief goods.

Mga kawani gikan sa probinsyal ug rehiyonal nga buhatan sa DSWD namutos usab og mga mga relief goods sa Lamberto Macias Sports Complex aron ipang apo-apod sa mga apektadong local government units tabok sa probinsya.

Nanawagan usab si DSWD Region 7 Evelyn Macapobre og mga donasyon sama sa banig,kaldero mga plato ingon man mga kahimanan sa kusina.

Si Macapobre nahiabot sa Dumaguete sayo sa buntag Disyembre 18 uban ang mga sakyanan nga adunay karga nga mga de lata ug uban pa nga mga relief goods aron ipang apod-apod sa mga dapit sa probinsya nga apektado sa Bagyong Sendong.

Dugang mga de lata ug mga sinina ang gihatod usab sa siyudad sa Dumaguete gikan sa DSWD regional office sa Cebu City niadtong gabii sa Dec.18.

Ang regional director personal nga nisaksi sa pagpamutos ug bugas, de lata ug mga ginamit nga sinina didto sa Lamberto Macias Sports Complex.

Si Macapobre sa usa ka pagpakighinabi nagkanayon nga ang National Food Authority sa siyudad sa Dumaguete niabli sa ilang bodega niadtong Dec,18 aron paghatag og stocks sa bugas subay sa awhag sa DSWD.

Mga sundalo gikan sa Philippine Army sa Negros Oriental nitabang usab  sa pagmutos sa mga relief items. (Translated into Cebuano by Amor Saludar/ PIA-CEBU)

===========

LTO molunsad sa Oplan “Ligtas na Krismas”

Ni: Juju Manubag-Empuerto

CEBU CITY, December 21 (PIA) – Ang Land Transportation Office (LTO)-7 molunsad karong adlawa sa “Oplan Ligtas sa Krismas” nga mohuman sa Enero 3 sunod tuig.

Ang maong proyekto ubos sa action plan sa Department of Transportation and Communication (DOTC) aron pagsiguro ang hamugaway, luwas ug maabot nga pagbiyahe niadtong manuroy sa nasod karong panahon sa Pasko.

Ang pagpatuman sa proyekto kay usa ka antisipasyon sa gitiman-an nga pag-usbaw sa mga gidaghanon sa pasahero nga mobiyahe sa panahon sa Pasko.

Si LTO-7 regional director Raul Aguilos misulti nga maghimo sila ug ‘drug testing’ sa mga drayber sa bus diha sa Cebu South Bus Terminal ug North Bus Terminal uban ang Land Trasnportation Franchising Regulatory Board (LTFRB).

Mopahigayon usab ang LTO-7 ug ‘road worthiness test’ ug lektyur kabahin sa kahilwasan sa dalan sa mga natino nga mga terminal sa bus nga sugdan sa Cebu South Bus Terminal, matod pa.

Matod pa ni Aguilos na ang mga tigpatuman sa trapiko uban sa mga katimbang nga mga ahensiya sa pangagamhan paghingusgan ang kampanya sa mga mahisalaud sa trapiko. (FCR/JSME/PIA-Cebu)