Duty-Free Philippines mopalit sa ‘Tindahang Pinoy’

Ni: Juju Manubag-Empuerto

CEBU CITY, December 8 (PIA)---Si Asteria Caberte, ang Regional Director sa Department of Trade and Industry (DTI)-7 mipahibalo atol sa paglusad sa kinaunhan nga ‘Tindahang Pinoy’ sa Bisayas rehiyon ug ikatulo sa tibuok nasod nga ang Duty-Free Philippines magsugod na ug palit sa Tindahang Pinoy aron kini maka-supply sa ilang mga outlet sa tibuok nasod.

Matod pa ni Caberte nga ang maong lakang makatabang ug dako sa mga exporters nga maka-suot sa mga lokal ug turismo nga merkado ug parte sab kini sa promosyon sa Tindahang Pinoy.

Ang DTI 7 ug ang Cebu Gift, Toys, and Houseware Foundation Inc. (Cebu-GTH) mi-abli sa imaging adlaw sa Tindahang Pinoy sa Bridges Town Square sa Alang-alang, Mandaue City.

Si Mandaue Mayor Jonas Cortes, Vice-Governor Agnes Magpale ug DTI Regional Director Asteria Caberte ug Engr Ramir Bonghanoy, manager sa GTH-Cebu maoy mga pasinungdan nga mga dinapit sa giingong okasyon.

Mitambong usab sa maong tigom ang mga exporters sa rehiyon, media, suplayers,  mga kadagkoan sa mga ahensiya sa kagamhang lokal ug nasyonal.

Si Caberte midugang sa pagsulti nga 70 porsiyento sa mga produkto nga ibaligya sa Tindahang Pinoy magagikan sa Tungatungang Kabisay-an.  Ang nabiling 30 porsiyento mga produkto nga ibaligya kay sa ubang rehiyon sa nasod magagikan.

Ang DTI nagplano nga moabli pa ug daghang Tindahang Pinoy sa mga stratehiyang lugar sa rehiyon ug usa niini didto sa Bohol ablihan sa sunod tuig.

Ang Tindahang Pinoy outlet sa Sugbo gidumala sa Cebu-GTH. (PIA-Cebu)