Cebuano News: Bansay-bansay pagproseso sa saging pagasugdan karon sa Siquijor

by Rizalie A. Calibo

SIQUIJOR, Dec. 6 (PIA) -- Adunay pagahimoon nga pagbansay-bansay alang sa pagproseso sa saging kon Training on Banana Processing sugod karong adlawa (December 6-7) sa conference hall sa buhatan sa Department of Science and Technology niining probinsya.

Sumala ni provincial director Mario de la Peña, ang maong bansay-bansay gitakda alang sa dili momenos ka 25 ka mga sakop sa Siquijor Banana and Peanut Producers Association (SBPPA) aron paghatag kanila ug higayon nga makat-on sa mga pamaagi pagproseso sa saging bulahan makatabang nila aron mouswag ang ilang panginabuhi ug makaaghat kanila aron mamahimong tigpatigayon sa umaabot nga mga adlaw.

Kini usab, sumala pa, makatabang aron mapauswag ang industriya ug patigayon sa saging ingon man sa turismo sa lalawigan.

Matud pa ni dela Peña dili angay limitahan ang mga mag-uuma sa pagpananom lamang ug saging hinuon angay silang tagaan ug oportunidad pag-uswag sa ilang katakos ilabi na sa pagproseso sa ilang abot.

Sa kasamtangan, aduna lamang lima ka local nga tigproseso sa saging sa Siquijor, usa na niini ang Duran Banana Products kansa nakadawat ug daghang ayuda gikan sa Small Enterprise Technology Upgrading Program (SETUP) sa DOST.

Apan matud pa niya, ang maong mga tigpatigayon nakapunting lamang sa susamang produkto sama sa banana chips.

Kining bag-ong training nga ilang ihatag magtudlo ug uban pang mga produkto sama sa banana ketsup, harina, marmalade ug uban pa, sumala pa niya.

Ang training pagahimoon ni Josie Elli ang resource speaker nga usa ka eksperto sa matang sa pagkaon ug miyembro sa DOST-7 Food Safety Team, ang unang naorganisa ug giilang food safety team sa nasud. (PIA-Siquijor/Rizalie A. Calibo)