Cebuanos: Botar ‘online’ para sa kadaugan sa PMMP

CEBU CITY, Dec. 4 (PIA) ---  Si Eufracio Maratas Jr., bise mayor sa Pilar, Camotes mi-awhag sa tanang mga Cebuanos sa pagbotar online (www.solutionsearch.org) sa Pilar Municipal Marine Park (PMMP) isip pinakamaayohan nga ‘marine protected area’.

Si Maratas mi-awhag sa programa sa radyo nga ‘Ang Siyudad ug ang Lungsod Karon’ sa Cebu Association of City and Municipal Information Officer (CAOCAMPIO) nga ang PMMP kay anaa sa nag-una nga napulo ka pwesto kon ‘top 10 finalist’ sa 100 ka mga entrada sa 48 ka mga nasod sa tibuok kalibutan.

Tulo lamang ang kuhaon nga mananaog ug karong Disyembre 24 mohuman na ang botasyon. Sa Enero 6 sunod tuig himoon ang pag-anunsiyo sa mananaog, pahibalo  ni Maratas.

Ang unang mananaog modawat ug $20,000 samtang, ang laing duha ka mananaog kay adunay $5,000-project grant, sumala pa.

Si Maratas miingon nga 2005 pa kini nila gisugdan sa pag-preserbar ug gibantayan ang PMMP.

Ang PMMP kay 180 ka ektaryang parte sa kadagatan nga anaa sa isla sa Ponson ug gi-utlanan sa duha ka baryo sa Lower Poblacion ug Villahermosa didto sa Camotes.

Ang traynta ka ektarya nga parte sa PMMP kay walay gitugutan sa pagpanagat apan ang pagpamana ug pagpamasol gitugotan diha na sa 150 ka ektarya sa PMMP, sulti ni Maratas.

Sa sinugdanan pa matod ni Maratas nga daghan ang supak sa mao nga proyekto nila tungod wala silay nakita nga maayong epekto. Diha na sa ika-tulo ka tuig nakita sa mga taga-isla ang kaanindot sa ilang kadagatan tungod sa proyekto nila.

Abunda na kaayo ni dagko ug daghang klase sa isda, korales, fauna sa daghan ug uban pa.

Gani, midaog ang PMMP sa tuig 2009 isip “Most Outstanding Marine Protected Area” sa tibuok nasod.

Sa laing bahin, si Carlo Dugaduga kinsay anchor sa programa sa radyo ug presidente sa CAOCAMPIO misulti nga sa bag-o niyang gitambongan nga 3^rd Convention of League of Cities nga nahisgutan ang pag-agni sa pagbotar sa PMMP tungod dako kaayo ning kadungganan alang natong mga Cebuanos.

Dugang ni Dugaduga nga sa umaabot nga panagtigom sa Caocampio karong Disyembre 9-10, iyang dasigon ang ubang pang information officers sa 50 ka mga lungsod ug siyudad sa Sugbo nga botaran ang PMMP pinaagi sa pagsulod sa  web address nga www.solutionsearch.org.

Ang piniliay sa pinakamaayohan nga ‘marine protected area’ kay pinasiugdahan sa National Geographic ug Rare nga mga organisasyon. (PIA-Cebu/JSME)