Cebu City nisagop sa DILG memorandum bahin sa koleksyon sa buwis

by Amor Saludar

CEBU CITY November 25 (PIA) --  Ang konseho sa siyudad sa Sugbo nipahimangno niadtong mga tigkolekta og buwis sa siyudad nga dili mangayo og entrance fee niadtong mga produkto nga dad-on dinhi sa siyudad gawas kung kini alang sa mga kamerkadohan.

Gitataw nila ni Councilors Margarita “Margot” Osmeña ug Alvin Dizon nga ang pagkolekta og buwis sa mga produkto nga gidala dinhi sa siyudad bisan kung kini dili alang sa mga kamerkadohanusa ka kalapasan sa direktiba sa Department of the Interior and Local Government.

Sumala pa sa duha ka konsehal nga sila dili supak sa pagkolekta og en try taxes apan niadto lamang mga produkto igbabaligya sa merkado.

Dugang pa ni Osmeña ug Dizon nga gikinahanglan nga ang mga tigkolekta og buwis motuman gayud sa direktiba sa DILG aron sa ingon dili usab maapektohan ang mga konsumidor labi na panahon sa kalisud gumikan  kay ang padayon unya nga pagpangolekta sa buwis og lain pang mga balayranan pakapaaghat usab sa supplier pagpasaka sa presyo sa ilang mga produkto.

 Si DILG Secretary Jesse Robredo sayo pa lang ni warning  na sa mga local officials nga dili mangolekta og balayranan niadtong mga motor vehicles og trucks nga moagi sa ilang teritoryo kini human nakadwat og taho ang naasoy’ng ahensya nga aduna’y uban nga mga LGUs nga wala nisunod sa palisiya kabahin niini.

Sila si Osmeña ug Dizon nikutlo sa Section 133 sa Local Government Code nga naghatag og limitasyon sa pagpatuman sa mga balayranan ug uban pa’ng mga charges niadtong mga produkto nga mososulod ug gawas sa teritoryo sa mga local government units isip hulip sa mga bayad sama sa wharfage, tool alang sa mga taytayan ug uban pang bayranan.

Basi sa iyang direktiba si Robredo naghatag og kamanduan  sa mga local chief executives  sa dili pagpatuman og mga kasamtanga’ng ordinansa nga nagtugot sa koleksyon sa buwis niadtong mga produkto nga naggikan sa mga probinsya, regulatory fees sa mga pasahero dinha sa local nga mga pantalan ug dugang pa nga balayranon sa bisan  unsa pamaagi dinha sa pagbyahe sa mga produkto ug mga pasahero.

Ang konseho sa Sugbo niaprobar na sa resolusyon kabahin niini diin ang kopya unya sa naasoy’ng resolusyon ipadala usab ngadto sa buhatan sa City Treasurer ug sa Market Authority. (AS/PIA-CEBU)