DSWD ug Jollibee nilunsad sa 'Piso-piso alang sa Batang Sugbo'

By: Hazel F. Gloria

CEBU CITY, Nobyembre 23 (PIA) --- Ang Department of Social Welfare and Development sa rehiyon  (DSWD-7) kaabag ang Jollibee Food Corporations bag-ohay'ng nilunsad  sa programang “Piso-piso alang sa Batang Sugbo” didto sa Mambaling, Cebu City.

Ang tumong sa programa mao ang pagdasig sa mga Badjao sa pagsunod sa mga kondisyones sa Pantawid Pamilya sama sa pre-natal ug post natal care alang sa mga mabdos; pagpamakuna; binuwan nga pagkonsulta sa mga kabataan; 85% nga pagtambong sa mga kabataan sa eskwelahan ug ang pag-apil sa mga Family Development Sessions (FDS) ug uban pa.

Mikabat sa 100 ka mga Badjao ang nakapahimolos sa libreng serbisyo sa pagpangonsulta sa taga Cebu City Medical Center (CCMC) ug ingon man ang gipahigayon usab nga seminar kabahin sa dengue ug proper hygiene.

Sa laing bahin, ang DSWD-7 nanghatag usab ug mga ginamit nga mga bisti.

Ang usa ka pamilya sa Badjao nga makasunod sa mga kondisyones sa programang Pantawid Pamilya makadawat ug insentibo sama sa pagkaon ug uban pang papremyo gikan sa Jollibee.

Mipahayag ang taga Jollibee nga kinahanglan gyud hatagan ug importansya ang Badjao community. Gikan sa mga nagkalain-laing Jollibee outlets sa Sugbo ang kwarta nga gigamit sa maong aktibidad.

DSWD-7 Pantawaid Pamilya Program regional Information Officer Aileen Lariba mibutyag nga ang maong kampanya usa ka ehemplo sa private-public partnership isip usa mga programa sa administrayong Aquino.

Midugang si Lariba nga makatabang kaayo ang maong programa sa mga lugar nga nagkihangkan sa serbisyo sa gobyerno kaabag ang mga pribadong sectors.(PIA-7/hfg & DSWD-7/al)

============

Pantawid Pamilya nakatabang sa panginabuhian sa taga Buenavista

By: Hazel Gloria

CEBU CITY, Nobyembre 23 (PIA-7) --- Ang programang Pantawid Pamilya sa Department of Social Welfare and Development (DSWD) nakatabang kaayo ug dako sa mga taga Buenavista, Bohol pinaagi sa paghatag ug suporta sa edukasyon, rice subsidy, pagpakaon o feeding, ingon man sa adlaw-adalaw usab nila nga panginabuhian og ang paghatag  ug pensyon sa mga tigulang nga nag-edad og 60 pataas.      

Matud ni Buenavista Mayor Ronald Lowell Tirol nga nakatabang gyud ang programa sa pagpalambo sa ilang ekonomiya sa lungsod og kauswagan sa kinabuhi sa iyang mga katawhan didto.

Kining kalamboan sa ilang munisipalidad, nasaksihan sa mga taga media sa rehiyon 7 sa gipahigayon nga Media Tour sa DSWD niadtong Nobyembre 11, 2011 sa maong lungsod.

Ang DSWD-7 ni showcase sa Buenavista tungod sa paglambo sa mga programa og proyekto sa Pantawid Pamilya nga gihuptan sa maong lugar sama sa Self-employment Assistance- Kaunlaran (SEA-K) nga makahatag ug microenterprise development assistance og uban pa.

Laing proyekto mao ang KALAHI-CIDDS pinaagi sa “Bayanihan” system nga nakatabang usab sa pagpalambo sa ilang komunidad. Ang proyekto mipakita sa ilang pagtinabangay og pagtambayayong sa usag-usa aron makab-ot ang ilang gitinguha.        

Sa laing bahin usab, mapasalamaton kaayo ang mga nakabenepisyo sa maong programa kay nakatabang gyud kini nga mamaayo ang ilang pagpuyo.

Si Reynaldo Antog ang  principal sa Overland Elemetary School nipahibalo sa media nga misaka ang enrolment og 96% karong tuiga kumpara sa niaging tuig nga 91.16% lang sa wala pa ang Pantawid Pamilya nga programa.

Matud ni Antog nga pinaagi sa programang 4Ps, nakab-ot nila ang ilang gitinguha nga modaghan pa ang mga estudyante sa ilang eskwelahan. Sa pagkakaron, aduna silay 234 nga na enrol lakip na ang pre-school.

Mapasalamaton kayo si Mayor Tirol sa DSWD tungod kay nakab-ot nila ang mga proyekto og mga aktibidadis pinaagi sa programang 4Ps. Nanghinaot sya nga mapadayon pa sa DSWD ang pagsuporta sa ilang lungsod aron mapalambo pa niini ang ekonomiya.

Alang kang Mayor Tirol, mahinongdanun kaayo ang Convergence Strategy sa DSWD aron ubay-ubay pa gyud ang matabangan niini nga mga katawhan sa iyang lungsod ug mapauswag pa ang ilang lungsod.(PIA-7/HFG)