Del Mar mangayo sa gipangsakmit nga mga parte sa pusil alang sa kapulisan ug ganahan kini

CEBU CITY, Nobyembre 21 (PIA) ---  Ang kanhing representante sa Sugbo nga si Raul del Mar miboluntaryo nga mohangyo sa Bureau of Customs (BOC) nga I-onar ang nasakmit sa miaging semana nga 400 mil nga balor sa nagkalain-laing parte sa pistula ngadto sa kapulisan sa Sugbo.

Si del Mar mipahibalo nga iya nang giingnan si Cebu Customs District Collector Ronnie Silvestre parte sa iyang plano nga impormal pa kini.

Matod ni del Mar nga nagpaabot siya sa kopya sa pormal nga imberntaryo sa mga gisakmit nga mga parte sa pistula ug sa hukom sa mga opisyales sa Cebu City Police kung himuslan ang higayon.

Lakip sa mga nasakmit sa BOC mao ang 1,080 nga nagkadaiyang parte sa M16 nga armalite, 294 ka buok nga mga basiyong bala nga dunay ‘primer’, 100 ka mga tingga sa 9mm nga pusil, dul-an sa 1,000 nga tingga sa .30 kalibre nga pusil, 100 ka tingga sa .45 kalibre  ug napulo ka ‘butt stocks’. 

Ang mga parte sa mga pistula kay nalakip sa 3.5 milyones ka pesos nga kantidad sa nasakmit nga gipayuhot nga 6 ka gipang-distrungka nga dagkon motor, silya, sopa, dulaan, mga dayandayan sa balay nga nasulod sa 50-footer nga van gikan Estados Unidos ug dinhi sa Sugbo gidiskarga.

Si Silvestre sa iyang bahin misulti nga inig madawat niya ang ang gihangyo ni del Mar, iya dayon kining iduso sa ulohan aron paga-aksiyonan ni Custom Commissioner Raffy Biazon.

Sa laing bahin, si Silvestre mipa-alerto sa iyang mga sakop nunot sa mga taho nga daghan pang mga tao ang dunay tinguha nga magpayuhot ug mga bililhong butang hilabina nga nagkaduol ang Pasko.  (PIA-Cebu/JSME)

==========

DOST-7 may bag-ong teknolohiya para makunhuran ang kunsomo sa tubig

CEBU CITY, Nobyembre 21. (PIA) ---  Ang Departamento sa Siyensiya ug Teknolohiya sa rehiyon 7 nakahimo ug bag-ong paagi aron makunhoran ang paggamit sa tubig ug kini eco-efficient pa gyod ang giingon straktura.

Si DOST-7 Asst regional Director Edilberto Paradela misulti nga ang bag-o nga teknolohiya makatabang sa pagkunhod sa kunsomo sa tubig ug ingon man ang bayranan matag bulan kun matag establisimento ug panimalay mosagop sa ilang gitawag nga Integrated Rainwater and Storm Water Harvesting nga paagi nga gihimo sa ilang buhatan.

Si Paradela mipahibalo nga ang ilang edipisyo adunay pasilidad nga mopupo sa mga tubig-ulan ug salaon kini para magamit sa ilang kasilyas ug sa pagbubo sa ilang mga tanom.

Matod pa ni Paradela nga ang giingong pasilidad nakapakunhod sa ilang bayranan sa tubig ug 75 porsiyento.

Si Paradela midasig nga kinsa kadtong interesado ug buot masayod ug sun-on ang ilang gihimo, mahimong moadto sa ilang buhatan sa DOST-7 kay ang mao nga teknologiya ila kining gi-promot karon.

Galing lang ideterminar pa ang kantidad sa giingon nga proyekto tungod ang  kalamboan niini, usa ka panagtambayayong sa mga taga-DOST, Korean International Cooperation Agency (KOICA), United Nations Economic and Social Commission for Asia and the Pacific (UNES-CAP) ug mga pribadong kumpanya, sumala sa opisyal.

Si Paradel nagkanayon nga mao nga teknolohiya makatabang ug sulbar sa mga isyu nga gi-atubang sa rehiyon sama sa kalidad sa tuibg, walay gamit sa tubig-ulan, pagbaha ug uban pa. (PIA-Cebu/JSME)

==========

Kapin 200 ka mga lawak-saringan gi-andam para sa 2012 nga abli sa klase

CEBU CITY, Nobyembre 21. (PIA) ---  Kapin sa 200 ka lawak-saringan ang madugang sa mga tinunan sa nagkalain-laing eskwelahan sa probinsiya sa Sugbo para sunod nga abli sa klase.

Si Provincial Engineer Eulogio Pelayre miingon nga 115 ka mga eskwelahang-dakbalay nga may duruha ka mga lawak-saringan kada usa ang mahuman na ug tukod sa dili pa moabli ang klase sunod tuig.

Si Pelayre mipahibalo nga kapin tunga na niini ang nahuman na ug ang laing tunga kay sige pa ning gi-konstrak.

Gipahibalo usab ni Pelayre nga buot ni Gobernadora Gwendolyn Garcia nga ibutang ang mga tunghaan sa mga dapit na makit-an ra dyon aron malayo sa mga bandal.

Anaa sa sa dul-an 1,000 ka mga tunghaaan ang natukod sa Probinsiya inig ka human sa 200 nga mga bag-ong tukod nga tunghaan sukad sa tuig 2005 ubos sa mga prayoridad nga proyekto ni Gov. Garcia, sumala pa ni Pelayre.

Sa usa ka tigom, si Garcia mihatag sa Maros 15, 2012 nga tagal nga humanon sa kontraktor ang kapin 200 ka mga lawak-saringan. P80.5 milyones ang kantidad nga gigahin sa mao nga proyekto, matod pa.

Dul-it ni Garcia nga matag tuig makatukod kini ug kapin 200 ka mga tunghaan sa tibuok probinisya kay iyang gusto ang ideyal nga 40 ka mga tinun-an matag lawak-saringan.

Ang Hunta Probinsiyal Bord sa tunghaan mi-alokar ug 177.8 milyones ka pesos alang sa tuig 2011-2012 ug lakip na iniini ang 200 ka mga lawak-saringan, (PIA-Cebu/JSME)

=============

Unang forensic cyberlab sa CV gitukod

CEBU CITY, Nobyembre  22 (PIA) --- Usa ka andana nga dakbalay ang tukuron sa sulod sa Cebu Provincial Police Office (CPPO) Compound sa Sudlon, Lahug para ibutang ang usa ka ‘computerized forensic’ nga laboratoryo.

Kining laboratoryo nga matapos ug tukod sulod sa usa ka bulan makahatag sa mga awtoridad ug kasayon sa pakig-gubat batok cyber na mga krimen ug pagpayuhot ug mga tao kon human trafficking, matod pa ni Gobernadora Gwendolyn Garcia.

Ang laboratoryo dili lamang mosilbe sa probinsiya sa Sugbo kon dili tibuok Tunga-tungang Kabisay-an.

Usa ka seremonyas sa groundbreaking gihimo kagahapon sa pasikaran sa CPPO nga gitambongan nila Garcia, Vice-Gov Agnes Magpale, Criminal Investigation and Detection Group (CIDG) Director Samuel Pagdilao Jr, CIDG-7 Chief Jose Pante, CPPO Supt Patrocinio Comendador, Chief Supt Samuel Yordan ug uban pang mga opisyales.

Ang master sa seremonyas nga si Sam Costanilla mi-anunsiyo nga ang proyekto mokantidad ug dul-an sa P1.5 milyones naglakip kini sa opisina sa CIDG dinhi sa Sugbo.

Human sa pinirmahay sa Memorandum of Agreement (MOA) tali sa opisyales sa Hunta probinsiyal ug kapulisan, P5 milyones nga kantidad nga mga digital nga kasangkapan sama sa kompyuter ang gi-inggriso sa CIDG-7 gikan sa United States Homeland Security.

Ang maong kalamboan gihangop sa mga opisyales sa kapulisan ug matod pa ni Pagdilao nga ang cyber lab maoy labing una dinhi sa rehiyon ug ilang gipili diri sa dakbayan pagatukoron tungod ania diri ang sentro sa tanang aktibidades sa komersiyalismo.

Dili na sab moadto pa ang mga kapulisan sa kaulohan alang sa ‘forensic’ eksaminasyon tungod mahimo na ngari sa Cebu. (PIA-Cebu/JSME)

============

Bag-ong teknolohiya gimugna sa DOST-7 makapaminos sa konsumo sa tubig

by Amor Saludar

CEBU CITY November 22 (PIA) -- Ang  Department of Science and Technology (DOST-7) nakamugna og teknolohiya nga eco-efficient water infrastructure nga makahimo sa mga establisamento sa pagpakunhod sa ilang konsumo sa tubig.

Gitataw ni DOST-7 Assistant Regional Director Edilberto Paradela nga kini’ng  bag-ong teknolohiya makatabang para mapakunhod ang konsumo sa tubig og mogamay usab  bili sa water bill kung ugaling sagopon kini nga teknolohiya sa  mga establisamento ug sa mga panimalay.

Gipresentar ni Paradela ang ilang Integrated Rainwater and Storm Water Harvesting nga gigamit sa ilang  kaulingon nga buhatan.

Sumala pa niya nga ang buhatan o ang building sa DOST- 7 aduna’y pasilidad nga motigumn ug mosala sa tubig sa ulan, storm water ug gray water, aron magamit kini pag-usab sa mga pansayan ug sa pagpamubo sa mga tanom.

Dugang pa ni Paradela nga kini nga pasilidad nakapakunhod sa konsumo sa tubig diha sa ilang buhatan og bali 75%.

Gibutyag  niya nga nagmugna usab sila og replication and capacity-building strategies engkaso aduna’y mga interesado og gusto’ng mo implementar ning  teknolohiya nga gi promote karon sa DOST-7.

Hinuon ang kantidad ning maong  proyekto matino lang unya basi sa kalambuan ning maong teknolohiya nga bunga sa panagtambayayong sa DOST, Korean International Cooperation Agency (KOICA), United Nations Economic and Social Commission for Asia and the Pacific (UNESCAP) ug mga pribado’ng buhatan ug kompaniya.

Matud pa ni Paradela ang nahisguta’ng teknolohiya gamit kaayo sa pagsulbad sa problema sa kalidad sa tubig, over extraction sa aquifer, ug ang wala pa gamit sa tubig sa ulan  ug mga pagbaha dinhi sa rehiyon.  (AS/PIA-CEBU)

===========

Administrasyo’ng Aquino prayoridad ang budget sa agrikultura sunod tuig

by Amor Saludar

CEBU CITY, November 22 (PIA) -- Giusbawan sa administrasyo’ng Aquino ang budget alang sa agrikultura sunod tuig, nahimo na kini’ng P61.7B, labaw og 60 porsyento komparar sa gialokar nga budget karo’ng tuiga.

Gitataw ni Senator Francis "Kiko" Pangilinan ang Senate Chairman sa Committee on Agriculture ug sa samang higayon Chairman of the Congressional Oversight Committee on Agricultural and Fisheries Modernization kini nagpasabot nga giila sa administrasyo’ng Aquino ang kamahinungdanon sa agrikultural nga sektor sa pagpakunhod sa kakabos ug sa pagpa-abante sa nasud.

Dugang pa ni Pangilinan nga human sa pila ka dekada nga seryoso’ng pagpasagad panahon na nga makuha sa agrikultural nga sektor ang angay kanila.

Gibutyag usab niya nga kini usa sa mahinungdanon kaayo nga lakang sa kagamhanan sa pagpausbaw sa kinabuhi sa mga mag-uuma ug mga mangingisda pinaagi sa pagpausbaw sa kahimtang sa agrikultura sa nasud. Mao usab kini ang yawe alang sa katuyoan sa nasud nga makab-ot ang kalambuan.

Sayo ning tuiga gipundok sa senador ang Agriculture and Fisheries (AF2025) Task Force uban ni Department of Agriculture Secretary Proceso Alcala ug mga reperesentante gikan sa pribado’ng sektor ug mga organisasyon sa mga mag-uuma ug mangingisda sa nasud alang sa panaghisgot-hisgot ug pag-ila sa mga nag-una’ng isyu nga nakababag aron mapakita ang potensyal sa sektora sa agrikultura ug pangisdaan sa nasud.

Usa sa mga isyu nga natuki atol sa naasoy’ng panagtigum mao ang limitasyon sa budget alang sa mga mag-uuma ug mangingisda sa nasud.

Daku ang pagtuo ni Pangilinan nga didto niadto’ng mao’ng panagtigum  uban ni DA Secretary Procy Alcala, Budget Secretary Butch Abad, Finance Secretary Cesar Purisima ug ni Presidente Aquino, nakab-ot ang desisyon nga pun-an ang budget sa DA sunod tuig.

Nagkanayon ang senador nga ang pagtaas sa budget sa agrikultura sigurado gayod nga makapaus-os sa kapobrehon sa nasud hilabi na sa mga bukira’ng dapit. (AS/PIA- CEBU)

===========

Probinsya sa Sugbo gipasidunggan sa NBI

by Amor Saludar

CEBU CITY November 22 (PIA) -- Ang probinsya sa Sugbo usa sa upat ka mga local government units dinhi sa nasud nga nakadawat og citation gikan sa general headquarters sa National Bureau of Investigation (NBI) atol sa kasumaran sa ilang ika 75 ka tuig nga anibersaryo kagahapon.

Ang ubang mga LGUs nga nakadawat sa sama’ng pasidungog naglakip sa Quezon City sa kaulohan, Javier sa probinsya sa Leyte ug probinsya sa Leyte.

Gitataw ni Capitol consultant Rory Jon Sepulveda nga ang nahisguta’ng pasidungog  gitunol ngadto sa gobernadora gumikan sa iyang walay sukod nga abag ug pag asister ingon man  kooperasyon  sa NBI.

Ang probinsya ning bag- o lang nitunol na usab sa ilang support sa NBI pinaagi sa pagtanyag nga mamahimo’ng  adto tukoron ang bag-ong  regional headquarters niini sa gipanag-iya’ng luna sa probinsya nga nahimutang  sa Sitio Sudlon, Barangay Lahug, dakbayan sa Sugbo.

Nipirma na og memorandum of agreement sila si Gov. Garcia ug NBI Director Magtanggol Gatdula bahin sa katukoran sa mao’ng buhatan.

Kining bag-ong building sa NBI-7 magsilbi’ng desente nga puloy-anan nga haom alang sa mga tigpatuman sa balaod nga daku og nahimo’ng  papel sa pagmintenar sa kalinaw sa Sugbo.

Ang construction sa nahisguta’ng building sugdan sa dili pa motapos ang tuig. (AS/PIA-CEBU)