Hepe sa pulisiya nimando nga hingusgan ang kampanya batok illegal nga drugas sa Tanjay

DUMAGUETE CITY, Nov. 21 (PIA) --- Ang hepe sa provincial police sa Negros Oriental naghatag og kamanduan sa tibook pwersa sa kapulisan sa lungsod nga pun-an pa ang ilang kakugi batok sa illegal nga drugas, subay sa taho nga nakapaalarma na ang problema sa illegal nga drugas sa siyudad sa Tanjay.

Sumala pa ni Provincial Police Director P/SSupt. Edward Carranza iya na nga gimanduan ang hepe sa dakbayan sa Tanjay nga doblehon ang iyang kakugi o kundili unya mabalhin siya og lain nga assignment.

Gibutyag ni Carranza nga mura og nakapaalarma na gyud ang problema sa illegal nga drugas sa Tanjay ug base sa ilang ebalwasyon ang mga illegal nga druga sa Dumaguete naggikan usab sa nahisgutang siyudad.

Ang Tanjay  City parte sa second congressional district sa probinsya sa Negros Oriental nga nahimutang mga 30 kilometros amihanang bahin sa centro niini’ng  Dumaguete City.

 Gitataw ni  Tanjay City Police Chief P/Sr. Insp. Domeniano Distrito Jr nga ang iyang estasyon  nagpadayon  sa paghimo og mga surveillance operations sa mga naila’ng drug personalities sa iyang area dinuyogan usab sa mga operatiba gikan sa National Bureau of Investigation (NBI), Criminal Investigation and Detection Group (CIDG) ug Philippine Drug Enforcement Agency (PDEA).  (Translated into Cebuano by Amor Saludar)

============

Programa para manglimpyo matag alas kwatro sa hapon gisugdan sa dakbayan sa Sugbo

by Amor Saludar

CEBU CITY, November  21 (PIA) -- Ang kagamhanan sa dakbayan sa Sugbo nimugna og programa nga gitawag og “4 p.m. habit” diin ang tanan nga mga manindahay sa dakbayan dungan nga manglimpyo sa ilang tagsa tagsa ka pwesto panahon nga mupatak na ang alas kwatro sa hapon.

 Si Doctor Lucille Mercado, chairman sa Garbo Asenso Sumbanan Alyansa (GASA), nagkanayon nga ang una’ng hugna ning programaha ilang gihimo subay sa Osmeña Boulevard.

Sa pakighinabi sa local nga mantalaan nagkanayon si Mercado nga “Matag hapon gyud na nila buhaton after ug mapasalamaton kaayo ko kay mikooperar gyud ang mga sidewalk vendors.”

Gibutyag ni Mercado nga diha lamang subay sa Osmeña Boulevard dul-an sa 300 ka mga manindahay ang miyembro sa GASA.

Gitataw niya nga tungod ning maong programa ang mga manindahay dinhi sa Sugbo dako og matampo alang sa kalimpyo sa siyudad hilabi na sa mga nag-unang agianan sanglit ang mga konsumidor magtapok sa ilang mga tindahan kung kini limpyo.

Matud pa ni Merkado nga nindot gayud nga tan-awon nga  kada alas kwatro sa hapon ang mga manindahay daplin sa kadalan magdungan pagdala sa ilang tagsa-tagsa ka mga silhig ug dust pan tungod kay aduna’y gidestino nga tawo nga magdala og bell ug patingugon kini isip pag alarma sa mga manindahay.

Gikataho nga sa pagkakaron wala pa’y gigahin nga budget ang kagamhanan sa Sugbo sa implemetasyon ning maong programa ug boluntaryo’ng serbisyo lamang kini sa mga manindahay dinhi sa siyudad.

Apan  na panglantawan nga hayan mohatag unya sa ilang suporta ang siyudad.

Parte ning maong programa ang pagpanglimpyo sa mga dagko’ng canals matag kwarter sa tuig.

Matud pa ni Mercado nga gawas sa dalan Osmeña Boulevard iapil na unya ubos sa programa ang uban pang mga kadalanan sa dakbayan. (AS/PIA-CEBU)