Duha ka adlaw  nga  Reg’l Conference paghisgut sa mga kaso

sa pagpang-abuso sa kababayen-an, kabatan-onan himoon sa Sugbo

CEBU CITY, November 19 (PIA) -- Ipahigayon dinhi sa Sugbo ang duha ka adlaw nga Regional Conference on Violence Against Women (VAW) and Child karon umaabot Nobyimbre 25-26, ubos sa tema’ng “Empowering Women: Changing Communities.”

Kini usa ka inasyatibo sa nagkalain-laing VAW-and-Child-Abuse advocates nga naggikan sa mga managlahi’ng non government organization dinhi sa Sugbo.

Ang proyekto’ng “Communities Learning to Stop Abuse and Nurture Social Empowerment (CLEANSE)”nagtinguha nga mapalig-on ang kasayuran sa  nahisguta’ng katilingbanon isyu aron pagtabang nga maminosan ang mga insidente sa domestic violence batok mga kababayen-an ingon man pagpang-abuso sa mga kabatan-onan dinhi sa rehiyon.

 Hisgutan sa mao’ng panagtigum ang gibug-aton sa mga insidente sa domestic violence ug pagpang-abuso sa mga kabatan-onan dinhi sa nasud, lakip na usab unya ang kamahinungdanon sa kolaborasyon sa matag hintungdan sa pag responde sa naasoy’ng isyu.

Ang regional conference magsilbi usab nga oportunidad alang sa koordinasyon sa matag nasudnong ahensya sa gobyerno, NGOs, mga tiggama og palisiya ug mga komunidad sa pagtubag sa mga kaso sa pagpang-abuso sa mga kababayen-an ug kabatan-onan dinhi sa rehiyon.  

Ang CLEANSE usa ka hinugpong nga proyekto sa Share-A-Child Movement (SACMI), Kaabag sa Sugbo Foundation, Inc., Stop Abuse of Minors Association (SAMA), Inc., ug  Coastal Conservation and Education Foundation (CCEF), Inc. ug dinuyogan sa European Commission.

Ang duha ka adlaw nga kalihukan nahimo usab nga posible pinaagi sa koordinasyon  sa Cebu Provincial Women’s Commission, Coalition on the War Against Human Trafficking ug Department of Social Welfare and Development 7. (Translated into Cebuano by Amor Saludar/PIA-Cebu)