Ambassador sa Israel nagtinguha og lig-ong relasyon tali sa Sugbo

by Amor Saludar

CEBU CITY November 17 (PIA) -- Ang Ambassador of Israel to the Philippines, His Excellency Menashe Bar-On, nagplano nga motukod og koneksyon tali sa Sugbo sa natad sa agrikultura, patigayon ug edukasyon.

Si Bar-On nipahigayon  og courtesy visit ngadto kang Governor Gwendolyn Garcia kagahapon  tulo ka bulan human sa iyang pag-asumiter sa katungdanan  human usab gidawat ang iyang  mga credentials ni Philippine President Benigno Simeon Aquino III didto sa Malacañang niadtong Agosto 23, 2011.

Dinhi gibahibalo  ni Bar-On ang gobernadora sa pipila ka mga lugar dinhi sa Sugbo nga mamahimo’ng masaliksik alang sa pagpakig-alayon sa nasud sa Israel lakip na niini ang mga kalambuan sa pagpanguma, panagbayloay og hunahuna kabahin sa edukasyon ang pagpakig-alayon sa mga sektor sa pamuo.

Ang  nasud sa Israel aduna’y agriculture experts diin gikataho nga dako unya kini og ikatabang nga mapalambo ang mga produkto’ng agrikultura dinhi sa Pilipinas.

Dugang pa ni Bar-On nga posible usab nga ikonsiderar sa nasud sa Israel ang pag export ug pag import sa mga produkto’ng agricultural gikan sa duha ka nasud.

Sa aspeto sa edukasyon gibutyag niya ang posible’ng mga scholarship sa nagka lain-laing natad sa edukasyon nga mamahimo’ng ikatanyag ngadto sa mga tinun-a’ng Filipino ug lakip na usab ang study grants alang sa mga opisyal sa gobyerno.

Nahinundoman atol sa panagtagbo ni Bar-On ug Garcia, ang nahimo’ng  tabang sa kagamhanan sa Pilipinas nga gipaabot sa nasud sa Israel niadtong panahon ni President Manuel Quezon sa dihang ang mga Hudiyo gilutos sa NAZIs diin ang Pilipinas nitanyag nga mamahimo’ng dalangpanan sa mga kagiw nga mga Hudiyo niadtong panahona.

Sumala pa ni Bar-On kini nga parte sa kasaysayan usa nga dili mahikalimtan sa Israel ug mao usab kini ang basihan sa gihimo’ng pagpanlimbasog aron manapahugtan ang koneksyon tali sa duha ka nasud.

Si Gov. Garcia nakabisita na usab sa nasud sa Israel subay sa imbestigasyon sa kaniadto Israeli Ambassador to the Philippines Zvi Aviner Vapni  sa tuyo nga mapalambo relasyon tali sa Sugbo ug Israel.  (AS/PIA-CEBU)

==========

MCWD nanawat ug aplikasyon sa linya sa tubig alang sa lumolupyo sa Bulacao

CEBU CITY, Nobyembre 17 (PIA) --- Ang Metro Cebu Water District (MCWD) nagsugod na ug panawat alang sa mga lumolupyo sa sitio Climaco ug Paglaum sa Barangay Bulacao sa Sugbo.

Ang duha ka sitio kay apil sa mga dapit diin ang serbisyo sa MCWD gi-suspendi tungod sa kakulang sa suplay sa tubig.

Sumala pa ni Noel Dalena, ang MCWD assistant general manager alang sa maintenance sa mga linya sa tubo misulti nga bag-o lang nahuman ang paglatad ug mga tubo sa maong dapit.

Dugang ni Dalena nga ang duha ka sitio, giserbisyohan sa usa ka pribadong tighatag ug tubig apan mireklamo sila nga dili paigo ang suplay niini.

Karon nga serbisyohan na sila sa MCWD, makalaom sila ug makanunayon ug mainom nga tubig, matod pa sa opisyal.

Matag-Miyerkoles ug Sabado sa alas 9 sa buntag, ang distrito nagahimo ug pasinati alang niadtong mo-apply ug bag-ong koneksyon sa tubig sa ilang buhatan sa dalan Lapulapu ug Magallanes sa dakbayan.

Gawas sa koleksyon centers sa JY Square, Global Pinoy, East West Bank, White Gold Inc., Metro Cebu Public Savings Bank, buot ipahibalo sa MCWD nga nag-abli sila ug dugang nga koleksyon center sa Hypermarket, J Mall sa dalan A.S. Fortuna sa Mandaue.

Abli ang sentro kada adlaw gikan sa alas 10 sa buntag hantog sa alas 8 sa gabii. Alang sa dugang kasayuran, mahimong matawag ang MCWD sa telepono 2548434, 2533366 ug 4067205. (PIA-Cebu/JSME)