BFP-7 gihingusgan ang kampanya batok pabuto

CEBU CITY, November 17 (PIA) --- Gihingusgan karon sa Bureau of Fire Protection dinhi sa rehiyon (BFP-7) ang ilang kampanya batok sa bisan unsa’ng klase sa mga produkto’ng pyrotechnic ug mga pabuto  lakip na usab niini ang paggamit sa mga Christmas decors/lights aron pagsiguro nga mamahimo’ng luwas ang publiko atol sa kasaulogan sa panahon sa Pasko.

 Atol sa usa ka pagpakighinabi gibutyag ni Insp. Fritzie Manatad , BFP-7 Information Officer nga aduna na sila’y gidestino nga mga kawani nga mao’y mosusi sa mga lugar diin gihimo ang mga pabuto. Ila usab nga monitoron ang mga tindahan ug malls nga nag hikyad og mga pabuto isip paninda.

Kini nga kampanya labaw nga gitumong alang sa kaluwasan sa publiko ug pagsanta sa bisan unsa’ng aksidente nga mahitabo panahon sa kapaskohan.

Andam na usab bisan unsa’ng orasa  ang mga kawani sa BFP aron sa pag asister ug pagtubag kun ugaling aduna’y mga emerhensiya nga motumaw ug andam usab sila nga moserbisyo 24 oras aron pagsiguro sa fire-free holidays o luwas sa sunog nga kapaskohan.

Sa lain bahin giawhag sa BFP ang publiko nga dili suportaan ang mga mga illegal ug ubos og kalidad ng mga Christmas decors, mga pabuto ug uban pang produkto’ng pyrotechnic nga makahatag og kadaot sa katawhan.

Gipahimangnuan usab sa BFP ang publiko nga magmatngon sa sunog hilabi na niadto’ng nagplano’ng magsaulog sa Pasko ug Bag-ong tuig gawas sa ila’ng panimalay o sa layo’ng dapit.

Giluwatan sa BFP kini nga mga pahimangno alang sa publiko; Sa dili pa mobiya sa panimalay, siguraduon nga unplug ang mga electrical appliances; iswitch off ang mga nag-una’ng tinubdan sa elektrisidad; dili biyaan ang mga kandila, suga o sigarilyo nga magsiga; isirado ang mga LPG valve; siguruon nga anaa sa luwas nga butanganan ang flammable/combustible substances o dali maniga nga mga butang. Kung mahimo mohangyo sa silingan o paryente nga anaa sa duol sa pagsusi sa inyong panimalay nga gibiyaan matag karon ug unya.

Nanghinaut ang nahisguta’ng buhatan nga walay mga kadaot nga mahitabo nga may kalambigitan sa mga pabuto ug minos lang unya ang mga insidente sa sunog sa pagtapos ning tuiga ug sa umaabot nga tuig. (Translated into Cebuano by Amor Saludar/ PIA-CEBU

===========

DTI mopahigayon og duha ka adlaw nga ‘media learning session’

CEBU CITY, November 17 (PIA) -- Ang Department of Trade and Industry (DTI) mopahigayon og duha ka adlaw nga media learning session nga may tema’ng “Doing Reports on Free Trade Areas: A DBFTA Learning Session for Media” nga ipahigayon karo’ng umaabot Nobyimbre 23-24 dinhi sa dakbayan sa Sugbo.

Imbitado sa mao’ng kalihukan ang mga business reporters gikan sa Cebu, Manila ug Mindanao.

Tumong sa nahisguta’ng kalihukan nga mapausbaw ang pagsabot sa mga magsisibya kabahin sa background,ingon man ang lig-on  ug mga importante’ng isyu nga may kalambigitan sa internasyonal nga patigayon.

Atol unya niini pagahisgutan usab ang kabahin sa kasabutan sa internasyonal nga patigayon, ug konsultasyon sa mga palisiya niini ingon man negosasyon ug uban pa unya’ng mga kalambuan kalabot niini.

Pagahimoon sa una’ng adlaw ang familiarization tour ug onsite interview sa mga pinili’ng exporting companies.

Mopahigayon usab og workshop alang sa representante nga mga magsisibya ang DTI-International Trade Group pinaagi sa buhatan ni Undersecretary Adrian Cristobal Jr.

Tungod ‘ning  mao’ng kalihukan gitataw sa DTI nga pinaagi sa hugot nga pakig-alayon sa mga magsisibya ug paghatag  kanila og luna alang sa diskusyon ug klaripikasyon sa mga detalye kabahin sa kasabotan sa nasud sa internasyonal nga patigayon ang kagamhanan makahatag na unya og tukma ug insakto’ng eksplenasyon sa mga kasayuran ngadto sa komunidad sa mga magpapatigayon, ug uban pa nga mga hintungdan ingon man sa  kinatibuk-ang publiko.   (Translated into Cebuano by Amor Saludar/PIA-Cebu)