Mga empleyado sa MEPZ-1 nakapahimulos sa serbisyo sa PAG-IBIG

CEBU CITY, November 15 (PIA) --- Nikabat ngadto sa 600 ka mga empleyado gikan sa Mactan Export Processing  Zone -1 ang nakapahimulos sa gitanyag  nga serbisyo sa PAG-IBIG Cebu North Branch atol sa gipahigayon nga duha ka adlaw nga Mobile Service Desk niadtong miaging Oktubre 20-21,2011 didto sa Football Field sa dakbayan sa Lapulapu.

Ang mga serbisyo nga gitanyag naglakip sa membership verification; printout sa mga Employee’s Statement of Accumulated Value (ESAV); conduct of several sessions of Fund orientation o briefing; online membership registration; pagpanawat sa mga MPL applications; printout sa Statement of loan balance;  ug housing loan counseling.

 Duha sa mga highlights sa naasoy’ng kalihukan mao ang hangyo sa miyembro nga printout sa ilang mga kontribusyon apil na usab ang detalye sa mga loans, ug loan balance statement. 309 ka mga miyembro ang nihangyo alang sa printout sa ilang mga kontribusyon, mga detalye ug subay niini samtang 112 ka mga miyembro ang nihangyo nga matagaan og printout sa subay sa ilang mga loan balance.

Gibutyag sa uba’ng  mga kadagkuan sa  Philippine Economic Zone Authority (PEZA) nga ang PEZA kinsa na regulate sa Mactan Export Processing Zone kanunay naghatag sa ilang suporta sa Pag–IBIG Fund Cebu North Branch sa mga kalihukan niini pagtubag sa mga panginahanglanon sa mga empleyado  sa mga kompaniya ubos sa PEZA.

Ang MEPZ-1 aduna’y kapin 100 ka mga pribado’ng kompaniya diin aduna usab kini kapin sa 50,000 ka mga trabahante.

Subay sa tumong sa PAG-IBIG Fund nga paghatod og serbisyo haduol sa ila’ng mga miyembro, kini nga financial institution padayon gihapon sa ila’ng plano sa pagpahigayon og Mobile Service sa mga kompaniya nga aduna’y daghan nga mga empleyado o sa uban  nga mga strategic areas sa amihana’ng bahin sa Sugbo.  (transalted into Cebuano by Amor Saludar/ PIA-CEBU)

===========

Kapin 50 mil naghupot ug pusil nga way lisensiya sa C. Visayas

CEBU CITY, Nobyembre 15 (PIA) --- Anaa sa 50 mil ka mga tao sa Tunga-tungang Kabisay-an ang kinaminosan nga nanag-iya ug mga pistulang walay mga lisensiya ug ang 3,000 ania sa Dakbayan sa Sugbo. Mao kiniy gipahibalo sa hepe sa Cebu City Police Office (CCPO) nga si Sr. Supt Melvin Benuafe.

Si Buenafe misulti nga ang pagdagsang sa walay mga lisensiya nga mga pistula ang nakatampo ug dako sa mga serye nga mga patay  ug mga krimen sa dakbayan.

Sa miaging semana lang dinhi sa dakbayan, unom ka tao ang namatay sa mga lain-laing insidente sa pagpamusil,

Si Buenafe nagkanayon nga ang gibana-banang gidaghanon sa mga ilegal nga tagkupot ug mga pistulang way lisensiya kay gi-basi sa mga ‘intelligence’ nga mga taho ug ‘feedbacks’ gikan sa bolunter nga mga grupo nga kaanib sa Philippine National Police (PNP).

Gipahibalo ni Buenafe nga apil na niining 50 mil ang mga pusil nga gamit sa miyembro sa Barangay Intelligence Network (BIN) nga walay mga lisensiya.

Si Buenafe miingon nga kining mga bolunter nga nakigbatok sa krimen wala tugoti sa pagdala ug pusil.

Usa pa sab sa hinungdan sa pagdagsa sa mga dili lisensiyandaong pusil mao ang sige paghimo ug illegal nga pusil sa siyudad sa Danao diin nagpadayon sa pagsiaw matod pa sa opisyal. (PIA-Cebu/JSME)

==========

Gikinahanglan ang pagsalbar sa mga nitibo’ng pinulongan sa nasud

CENTRAL VISAYAS, Nov. 15 (PIA)  -- Ang Defenders of the Indigenous Languages of the Archipelago (DILA) naalarma na nga ang uban sa mga nitibo’ng pinulongan nameligro’ng mawala na unya  gumikan sa sosyal ug ekonomikanho’ng  kalihukan sa mga katawhan.

Ang pagtuon nga gihimo niadto’ng 2003 nagpakita nga ang nailha’ng 32 ka mga pinulonga’ng Negrito dinhi sa nasud nameligro’ng mahanaw na unya.

Si Senadora Loren Legarda, ang chair sa senate committee on cultural communities miduso og lakang alang sa preserbasyon sa mga nitibo’ng pinulongan sa nasud dungan sa suporta nga iya’ng gipadayag sa kasamtanga’ng kalihukan pag salbar sa mga susama’ng kabilin.

Matud pa sa sendora nga daghan unya sa ato’ng mga nitibo nga pinulongan ang mawala ug makalimtan na lang kung mapakyas kita pag preserbar og pag pausbaw ‘ning maong matang sa nasudno’ng kabilin.

Dugang pa niya nga mahinungdanon usab kini nga aspeto sa ato’ng kailhanan isip nasud.

Gitataw ni Legarda nga daghan sa mga nitibo’ng pundok sa katawhan ang mipili na lamang nga abandonahon ang ilang namat-an nga pinulongan ug motabok ngadto sa lain diin napanglantawan nga superyor gumikan kay kini magpahimo’ng sayon alang kanila nga mamahimo’ng parte sa komunidad diin sila nahisakop ug moabli og dako’ng ekonomikanho’ng oportunidad partikular na sa pagpanrabaho.

Aron pag preserbar sa nitibo’ng pinulongan sa nasud ang DILA nisugyot og Mother Tongue Based Multi Lingual Education ((MTB-MLE) uban sa programa’ng Culture-Based Curriculum (CBC) isip posible’ng solusyon ‘ning  mao’ng problema.

Kini nga lakang mogamit sa naandan nga pinulongan alang sa paghatag og instruksyon sa unang ang-ang sa edukasyon sa mga kabatan-onan.

Sa pagkakaron hinay-hinay na kini nga gisagop sa Department of Education.

Sumala pa ni Legarda nga ang pagtuon nagpakita nga ang paggamit sa naandan nga pinulongan sa paghatag og instruksyon sa mga tulunghaan nakatampo sa maayo’ng kalidad sa mga tinun-an sa eskwelahan.

Giklaro usab sa senadora nga ang Mother Tongue Based Multi Lingual Education nga   gigamit sa Department of Education usa ka mekanismo nga magamit aron pagsalbar sa ato’ng mga pinulongan ug makatabang usab sa mga kabatan-onan nga maka kat-on og epektibo ug duga’ng pagtulon-an.

Dugang pa ni Legarda nga mayoridad sa mga Filipinos nigamit sa Tagalog ug English nga pinulongan apan wala kini nagpasabot nga ato na lamang iabandona, kalimtan  ug pasagdan na lang ang ato’ng mga nitibo’ng pinulongan nga sa tinuod lamang mao usab kini ang una’ng pinulongan sa ato’ng mga ninuno.

Matud pa sa senadora nga angay ug makataronganon lang nga ato’ng ipreserbar kini nga mga pinulongan isip timaan sa ato’ng pagrespeto sa ato’ng kasaysayan ug kabilin.  

(translated by Amor Saludar/ PIA-CEBU)