Maluntaro’ng panginabuhian alang sa mga

pamilya’ng benipisyaryo bag-ong tumong sa 4Ps

Ni: Amor Saludar

CEBU CITY, November 11 (PIA) -- Human sa nakab-ot nga kalampusan sa katuyoan sa Pantawid Pamilyang Pilipino Program (4Ps) sa paghatag og pinansyal nga ayuda sa aspeto sa edukasyon ug maayo’ng panglawas ngadto sa mga benipisyaryo niini, tumong na usab karon sa naasoy’ng programa ang paghatag og malungtaro’ng panginabuhian alang sa mga pamilyang  benepisyaryo  niini. Mao kini ang gibutyag ni DSWD- 7 Information Officer, Aileen Lariba atol sa gipahigayon nga Kapihan sa PIA-Cebu dili pa lang dugay.

Gitataw ni Lariba nga sa pagkakaron sila nagpahigayon og sunod-sunod nga convergence caravan sa mga pinili’ng probinsya sa rehiyon 7 nga gisalmotan sa uba’ng mga ahensya sa gobyerno ug mga pribado’ng sektor  aron mapapausbaw ang estado sa panginabuhian sa mga pamilya’ng benipisyaryo sa Pantawid dinhi sa rehiyon.

Kini tungod sa katuyoan sa 4Ps nga sa katapusan nig tuiga ang mga benipisyaryo nga pamilya makabaton og malangtaro’ng panginabuhian.

Dugang pa ni Lariba nga aduna usab sila’y gipahigayon nga consultation dialogue tali sa mga ngakalain-laing ahensya sa gobyerno aron hisgutan kung unsa ang partikular nga ekonomikanho’ng kalihukan ang mohaum sa usa ka lugar.

Sa kasamtangan ang 4Ps konektado na  usab sa DPWH, TESDA, DA ug uban pa’ng mga ahensya sa gobyerno nga aduna’y dako’ng ikatampo aron mapalambo ang panginabuhian sa mga benipisyaryo sa 4Ps dinhi sa rehiyon. (AS/PIA-CEBU)

===========

DSWD-7 nanawagan alang sa opisyal nga rehistrasyon sa mga benipisyaryo sa 4Ps

by Amor Saludar

CEBU CITY, November 11 (PIA) -- Nanawagan ang DSWD- 7 pinaagi sa ila’ng  Information Officer nga si Aileen Lariba ngadto sa tana’ng mga Local Government Units (LGUs) dinhi sa rehiyon sa pagsubay ug pagpahibalo sa mga benipisyaryo sa 4Ps sa ilang tagsa-tagsa ka mga lugar  nga opisyal kini’ng magparehistro aron padayon sila’ng makadawat sa mga binipisyo sa naasoy’ng programa.

Ipahigayon ang rehistrasyon sa ikaduha’ng semana sa Disyembre karo’ng tuiga ug ang DSWD-7 mohatag og deadline niadto’ng dili makaparehistro sa gikatakda’ng skedyul.

Ang mapakyas pagparehistro awtomatiko’ng matang-tang sa opisyal nga listahan sa mga benipisyaryo sa naasoy’ng programa ug dili na unya kini makadawat sa mga benipisyo nga gitanyag sa 4Ps.

Dugang pa ni Lariba nga responsibilidad sa matag LGU ang pagpahimangno sa ilang mga konstitwente nga ubos sa programa sa 4Ps sanglit sila man ang nagkupot sa mga listahan ug sa mga ngalan sa mga benipisyaryo nga nahisakop sa ilang tagsa tagsa ka mga dapit. (AS/PIA-CEBU)