Mga bisitang langyaw misaka ug 12 porsiyento

  

CEBU CITY, Nobyembre 9 (PIA) --- Dose porsiyento ang pagsaka sa gidaghanon sa mga bisita nga langyaw dinhi sa Pilipinas sa unang siyam ka bulan rong tuiga sumala sa Department of Tourism (DOT).

Ang DOT mipahibalo nga dul-an sa 2.9 milyones ang mga bisitang langyaw ang mianhi sa nasod sa sumala sa natalang datos gikan sa Enero hangtod Setyembre 2011 kumparar sa kapin 2.5 milyones nga na-log sa sama gihapong mga bulan sa miaging tuig.

Sumala sa DOT nga niadtong bulan sa Hulyo ang may gidaghanang miabot.

Ang mga bulan sa Enero ug Pebrero kay miposte ug 18 porsiyento ug 17 porsiyento. Samtang ang ubang mga bulan sa tuig gawas sa Marso ug Mayo kay milista ug doble nga numero nga pagsaka, sumala pa sa DOT. 

Dinhi sa Central Visayas, mitala ug kapin sa 17 porsiyento nga pagsaka gikan sa 1,165,072 sa miaging tuig nagdto sa 1,366,301 karong tuiga.

Nagpabilin nga ang mga Koryano maoy nag-una nga tig-ari sa nasod nga anaa sa 29 porsiyento ug milangkob sa kwentada sa 23.8 porsiyento sa  tanang moabot sa nasod.

Dul-an sa 700 mil ka mga Koryano ang mianhi sa nasod sa miaging 9 ka bulan.

Gisundan kini sa United States nga anaa sa kapin 466 mil ang mangari sa nasod o 4.73 porsiyento nga pagsaka kumprar sa miaging tuig nga natala.

Ang mga Hapon nakatampo sa ikatulo nga kinadaghanang mga bisita nga mangabot sa nasod nga kapin 286 mil nga nagkomponer sa 9.9 porsiyento sa kintibuk-ang miabot nga mga bisita sa nasod. (PIA-Cebu/JSME)

==========

Gilibkas sa Pagibig ang ‘penalty charges’ sa pabalay nga pautang

  

CEBU CITY, Nobyembre 9 (PIA) --- Naaprubahan na ang paglibkas sa pagbayad sa ‘penalty charges’ alang niadtong mga nanguha ug housing loans nga mga delingkwente sa pagbayad sa Home Development Fund (HDMF) o Pagibig.

Mao kini ang maayong balita gikan sa Bise-Presidente sa Pilipinas nga si Jejomar Binay nga mao usab ang tsirman sa board sa Pagibig fund.

Si Binay nagkanayon nga karong Enero sunod tuig sugdan ang paglibkas sa pagkolekta sa mga ‘penalty charges’ alang niadtong may mga delingkwente nga Pag-big housing loans.

Dugang ni Binay nga kahigayonan na kini alang niadtong adunay mga utang sa housing loan sa Pag-ibig nga tarongon ang ilang record sa pagbayad ug nanghinaot siya nga makaamgo ang mga miyembro nga ug mangutang sila ug kwarta sa pundo sa Pagibig o sa bisan unsang institusyon nga magpautang, aduna usab silay obligasyon sa pagbayad niini.

Isip mga miyembro sa Pagibig, ilang hunahunaon nga may responsibilidad silang buhaton nga adunay seguridad ang pundo sa Pagibig, miingon si Binay.

“Kusganon kong gidasig ang tanan ngamay utang sa Pagibig housing loan nga delingkwente na tungod nataligam-an sa pagbayad sa mga bulan ug mga tuig nga angay bayran nga kuhaon ning awahing higayon nga gihatag sa Pagibig nga wala-on na niini ang mga penalty charges”, sumala ni Binay.

Mandato sa Pagibig ang paghatag ug assistance sa mamumuong Pilipino nga matuman ang ilang mga damga nga makabaton ug kaugalingong balay, panapos ni Binay.

Alang sa dugang kasayuran, mahimong motawag sa HDMF-Cebu sa mga numero sa telepono 2315570, 2342707 ug 2342709. (PIA-Cebu/JSME)