2 ka ordinansa pabor sa kalikupan gikatakda’ng mopaubos na sa public hearing

 by Amor Saludar

CEBU CITY, November 8 (PIA) -- Gikatakda’ng ipahigayon ugma’ng adlawa ang public hearing sa giduso nga ordinansa nga nagsugyot sa paghatag og incentives sa mga tawo ug mga establisamento nga aduna’y dungganan ug inobatibo’ng ecological solid waste management.

Dungan unya niini ang public hearing sa gisugyot usab nga ordinansa nga nagmando niadtong buot magpakasal o mokuha og marriage license sa pagpananom og kahoy.

Gitataw ni Cebu City Council secretary Cynthia Kahulugan nga ang tana’ng miyembro sa konseho mohatag og oportunidad sa tana’ng interesado nga partido ug mga indibidwal nga madungog kung unsa man ang ila’ng tagsa tagsa ka mga habig bahin niini.

Giawhag usab niya ang publiko nga mosalmot sa proseso ug mopagawas sa ila’ng opinyon kabahin ning mao’ng mga ordinansa.

Kini nga ordinansa nga gipangamahanan ni Cebu City Councilor Nida Cabrera nagsugyot sa paghatag og ganti sama pananglit sa dili pagbayad og buhis ug uban pa’ng klase sa incentives ngadto sa mga establisamento o mga katawhan nga dako og gikatampo sa pagpatuman sa solid waste management.

Laing ordinansa nga giduso ni Cabrera nagsugyot  nga ang pagpananom og mga kahoy  himoo’ng usa sa mga rekisito alang sa mga bag-ong managtiayon  sa pagkuha og marriage license.

Ang Cebu City Environment and Natural Resources Office (CENRO) ang gitahasan  ubos ning mao’ng ordinansa nga mo asister ug morekomendar niadtong mga pribado’ng indibidwal o mga industriya nga angayan makapahimulos o mopaubos sa mga nahisguta’ng ordinansa.(AS/PIA-CEBU)

===========

Kongreso giawhag sa dinalia’ng pagpasar sa Cybercrime Prevention Act

 by Amor Saludar

CEBU CITY, November 8 (PIA) --  Nanawagan ang senado pinaagi ni Senador Edgardo  Angara  ngadto sa kongreso nga  dalion ang pagpasar sa balaodnon nga  gitumong alang sa proteksyon sa mga katawhan ug institusyon sa pagpangatake sa cybercrimes. 

Nipadayag sa iyang kahingawa ang Senador human sa nahitabo’ng  sunod-sunod nga mga cyber attacks sa government agencies ug mga kompaniya didto sa lai’ng nasud, sama sa Japan ug China.

Ubos sa Senate Bill 2796 or the Cybercrime Prevention Act nga gipangahamanan ni Angara ang mga aduna’y awtoridad nga mopatuman sa balaod matagaan og legal nga gahom sa pag imbestigar ug demanda niadtong mga malapason sa balaod ingon paghatag og dugang nga international nga kolaborasyon alang sa pagsanta, sa kapeligro ug prosecution sa mga cyber criminals. 

Ubos gihapon sa samang balaodnon ang mga tiggamitan og computer matagaan og proteksyon batok sa illegal access ug pagpahilabot sa mga data ug systems sayop nga paggamit sa kasangkapan sama sa computer programmes ug pagpangawat og passwords lakip na usab ang , cybersex, child pornography ingon man unsolicited commercial communications nga naglakip sa email spamming. 

Gitataw ni Angara nga ang kasamtanga’ng balaod sa cyber security dili pa igo aron matubag ang mga hulga sa cybercrimes, sama pananglit sa  Republic Act 8792 or the E-Commerce Act nga nagsilot lamang sa hacking, cracking and piracy. Wala giapil niini  ang tanang klase sa cybercrimes sama sa cyber fraud o pagpangilad gamit ang teknolohiya sama sa internet ug lain pa’ng mga susama nga kalapasan niini. 

Ang maong balaodnon nagsugyot usab sa paghatag og bug-at nga silot aron pagpakunhod sa mga kaso nga may kalambigitan sa cybercrime. Ang mga tawo nga makalapas sa balaod ubos ning maong krimen pagasilotan pinaagi sa pagkabilanggo ingon man pagmulta og mokabat ngadto sa P1 milyon samtang P10 milyones alang sa mga kompaniya nga makalapas sa samang salaod. (AS/ PIA-CEBU)

===========

DOST-NRCP mo host sa internasyonal nga sayantipikanho’ng kalihukan

by Amor Saludar

CEBU CITY, November 8 (PIA) ---  Ang Department of Science and Technology’s National Research Council of the Philippines (DOST-NRCP) mao’y mo host sa 12^th International Council for Science (ICSU) Regional Committee Meeting for Asia and the Pacific  karon’ng umaabot Nobyimbre 11-12, 2011 adto sa Marriott Hotel Cebu sa dakbayan sa Sugbo.

Ang panagtigum sa NRCP mopadayag sa mga maayong pamatasan ug pagtulun-an alang  sa promosyon sa natad sa syensya ug heath education  sama sa ; green productivity strategy; ug uban pa’ng mga isyu alang sa kausaban sa siyudadnon nga kinaiyahan.

Si DOST Kalihim Mario Montejo mao’y manguna sa delegasyon sa Pilipinas uban ni DOST Undersecretary for R&D Graciano Yumul, Jr.

Gilauman nga mosalmot sa mao’ng panagtigum ang mga delegasyon gikan sa 10 ka mga nasud nga sakop sa Asia Pacific Region pinangulohan sa mga technical paper presenters sama nila ni: Prof. Bruce John McKeltiar, chair sa School of Physics sa University of Melbourne sa nasud sa Australia; Prof. Soottipom Chitttmittrapap, secretary general sa National Research Council sa Thailand; ug Prof. Hong-Kum Lee, presidente sa Korea Polar Research Institute, Republic of Korea.

Ang uba’ng mga partisipante morepresentar sa lain pa’ng mga nasud nga sakop gihapon sa Asia Pacific Region nga naglakip sa China, Kuala Lumpur, Malaysia, India, Iran, and Sri Lanka.

Si Honorable Cebu Provincial Governor Gwen Garcia imbitado isip mao’y pormal nga mobukas sa naasoy’ng sayantipikanho’ng kalihukan, samtang si DOST Region VII Director Rene Burt N. Llanto maoy gitahasan sa pagpadayon sa tana’ng mga delegasyon nga naggikan sa uba’ng mga nasud ug mga mga local nga delegasyon gikan sa Pilipinas ingon man mga sakop sa DOST- NRCP. (AS/ PIA-CEBU)