8 ka mga tunghaan sa Sugbo nag-una sa kampanya ubos sa DepEd 7’s Brigada Eskwela

Cebu City, Nobyembre 4. (PIA) -- Ang Department of Education (DepEd)-7 mipahibalo nga walo nga mga tunghaan sa Sugbo ang nag-una sa ilang Brigada Eskwela nga kampanya karong tuiga.

Ang walo ka mga tunghaan mao ang Opao Elementary School, Banilad Elementary School, Mohon Elementary School, Subangdaku Elementary School, Kawit National High School, Daanbantayan National High School, Babag National High School ug ang Carlos Gothong Memorial National High School.

Ang mga mananaog gipili sa rehiyonal komitiba sa Brigada Eskwela basi sa ilang pag-alayon o teamwork, pag-ayo ug mintinar nga nabuhat ug sa pundo nga natigom.

Ang Brigada Eskwela o National Schools Maintenance Week mipuntirya nga ang komunidad mag-uban-uban matag ikatulong semana sa Mayo aron pag-ayo ug pag-preparar sa mga tunghaan sa elementary ug hayskol sa pag-abli sa klase.

Sa miaging tuig ang Brigada Eskwela sa Central Visayas nakatigom ug pundo nga miabot ug P49.5 milyones alang sa mga hayskol nga tunghaan ug laing P60.3 milyones para sa elementary nga tunghaan ug gisalmutan sa dul-an sa 3,000 nga mga tunghaan ug kapin 600,000 ka mga bolunter. (PIA-Cebu7/JSME)