Income sa Hunta Probinsya sa Sugbo misaka ug 80 porsiyento

CEBU CITY, Nobyembre 4 (PIA) -- Misaka sa 80 porsiyento ang kita sa Hunta Probinsiyal sa Sugbo karong tuiga kung itandi sa 2010, sumala sa asoy gikan sa buhatan sa  Department of Budget and Management (DBM).

Gikumpirma kini ni Roy Salubre, ang tresurero sa probinsiya bisan ug duha pa ka bulan una matapos ang tuig.

Si Salubre miingon nga ang hinungdan sa pag-usbaw sa kita sa Hunta kay ang gikarga nga balanse nga P1.4 bilyones nianang unang adlaw rong tuig tungod wala kini magasto sa 2010 nga badyet ug ang Internal Revenue Allotment (IRA) nga 1.677 bilyones ka pesos niini.

Ang tibuok kita sa probinsiya karong tuig miabot ug 3.73 bilyones ka pesos o 76.69 porsiyento nga saka sa 2010 nga kita nga 2.1 bilyones ka pesos.

Samtang ang kita sa Kapitolyo nga gikan sa mga local nga tinubdan mikabat ug P320.21 milyones. (PIA-Cebu7/JSME)

============

PRO-7 gideklara’ng malinawon ang pagsaulog sa ‘Kalag-kalag’ sa rehiyon

by Amor Saludar

CEBU CITY,  November 3 (PIA) -- Ang tibook rehiyon 7 nagpabiling malinawon bisan pa sa nagsugwak nga duot sa mga tawo sa mga sementeryo, ug sa gidaghanon sa mga mambyahiay ‘ning nangagi’ng mga adlaw.

Mao kini ang gitataw ni Police Regional Office (PRO) 7 Director Marcelo Garbo Jr.

Usa sa nakita’ng rason niini mao ang gipahugtan nga pro-active measures sa mga pulisya pagsanta sa mga krimen pinaagi sa pagkonpiskar sa mga ginadili nga mga materyales diha sulod sa mga sementeryo.

Gitataw ni Garbo nga gihingusgan nila ang ila’ng kampanya sukad pa sa nangagi’ng mga semana  agi’g pagpangandam sa Adlaw sa mga Santos ug  Kalag.

Dugang pa niya nga basi sa taho sa mga kontrabando nga nakonpiskar, dili kini daghan kompara sa miaging tuig ug nga kini nagpamatuod lamang nga nagmatngon na ang publiko.

 Si Chief Insp. Jane Recla, Mabolo Police Station nga mao’y ni superbisar sa Queen City Memorial Garden kagahapo’ng adlawa, nibutyag sa mga tigbalita nga aduna gayo’y pagkunhod sa mga nakonpiskar nga mga  ginadili’ng materyales.

“Gamay gyud ni compared last year, usa nalang gud ka box,” matud pa ni Recla.

Matud pa nga nahinangop usab si Garbo sa dedikasyon nga gipaita sa iyang mga sakop  sa pagsunod nila sa Philippine National Police guidelines. (AS/PIA-CEBU)