Task Force Undas gimugna sa Tunga-tunga’ng kabisay alang sa pagsaulog sa kalag-kalag

by Amor Saludar

CEBU CITY October  25 (PIA) -- Nipasalig  sa publiko ang Task Force Undas  dinhi sa Tunga-tungang Kabisay-an nga andam na sila sa pag protiher ug sa paghimo’ng luwas sa mga tugpahanan, pantalan ug mga terminal dinhi sa rehiyon atol sa pagsaulog sa kalag-kalag.

Ang pagkamugna sa Task Force Undas pormal nga gianunsyo kagahapo’ng adlawa atol sa gipahigayon nga meeting  sa Regional Management Council-7 pinangulohan ni Mactan Cebu International Airport Authority General Manager Nigel Paul Villarete

.

Ang RMC-7 gilangkoban sa regional directors sa Land Transportation Office, Land Transportation Franchising and Regulatory Board, Philippine Ports Authority, Cebu Ports Authority, Philippine Coast Guard, Maritime Industry Authority, Office of Transportation Security ug Civil Aviation Authority of the Philippines.

Matud pa ni Villarete nga sa MCIA aduna sila’y imontar nga help desks ug public assistance centers sa ilang domestic departure ug arrival areas aron sa pag asister sa mga pasahero ingon man pagtubag sa mga pangutana sa publiko. 

Gipaabot ang baga’ng duot sa katawhan nga magtapok unya sa tugpahanan ning mga adlawa diin  sagad unya niini mga chance passengers ug stranded passengers nga tugutan sa adminstrasyon sa MCIA nga moistar sulod sa departure area lahos na sa check-in counter aron maminosan ang kahuot sa lugar. 

Dugang pa niya nga ning higayona aduna unya’y kakulangan sa mga taxi ug paabangan nga mga sakyanan mao nga aduna sila’y ipagawas nga mga sakyanan aron pagserbisyo sa publiko.

Gipahibalo usab ni Villarete nga aduna usab sila’y pagatukoron nga centro diin mahimo’ng motaho ang publiko batok sa mga abusadong mga drayber.

Samtang sa habig sa   LTFRB-7 ug Land Transportation Office (LTO) ang duha ka ahensya magtambayayong unya pagtubag sa problema sa mga buses ug Public Utility Jeepneys.

Matud pa ni LTFRB-7 Regional Manager Ahmed Cuizon, giandam na usab  nila ang mga special permits alang niadtong mga buses ug mga  PUJs nga mo operate gawas sa ilang rota sa higayon nga aduna unya’y kakulangan sa mga sakyanan.

Nagkanayon usab si LTO-7 Regional Director Raul Aguilos nga aduna na sila’y giumol nga duha ka task force aron pag monitor sa mga buses ug PUJs nga magbyahian sa nagkalain-laing lungsod ug siyudad  sa Sugbo. 

Gipasaligan usab nila ang publiko nga ila gayud nga gukdon kadtong mga overloading buses ug mga PUJs nga mao usaha’y ang  hinungdan sa mga aksidente sa mga  kadalanan.

Subay niini ang mga opisyales sa MARINA-7 ug  Philippine Coast Guard maghiusa  pag monitor sa mga passenger vessels nga mopadulong ngadto sa mga silanga’ng probinsya sa Sugbo.

Nipasalig usab ang MARINA sa pag issue og special permits niadtong  dugang  nga mga sakyana’ng pangdagat uban sa nagkataas nga gidaghanon sa mga pasahero panahon sa kalag-kalag. (AS/PIA-CEBU)