1.5 milyones ka mga balay ipatukod sa Pag-ibig hangtod 2016

MANILA, Oktubre 26 (PIA) -- Gipuntirya sa kagamhanan nga 1.5M ka mga balay ang ipatukod sa Pag-ibig Fund sa dili pa moabot ang 2016.

Si Bise Presidente Jejomar Binay nagkanayon sa bag-o lang gipahigayong National Developers Convention sa kaulohan nga dunay igong pundo ang kagamhanan alang sa proyekto diin pagatambayayongan kini sa National Housing Authority (NHA) ug Social Housing Finance Corporation (SHFC).

Gi-awhag usab ni Binay ang pribadong sector nga mamuhunan sa socialized housing tungod ang kagamhanan adunay gitanyag nga tax incentive segun sa gilagda sa section 20 sa Urban Development and Housing Act (UDHA).

Si Binay naniguro nga mas tun-an nila ug unsaon nga mas maayo ang pag-implementar sa UDHA aron mas madasig pa ang daghang developer ug balay. (PIA-Cebu/JSME)

===========

Dollar remittances midoble ug saka: BSP

MANILA, Oktubre 26 (PIA) -- Misaka sa doble ang dollar remittances sa mga overseas Filipino workers (OFWs) bisan pa sa midangat nga krisis didto sa Europa ug Amerika.

Ang Bangko Sentral sa Pilipinas (BSP) mipahibalo nga mikabat sa 11.1 porsiyento ang pagsaka sa mga remittances sa dolyar sa mga OFWs dinhi sa Pilipinas diin miabot kini $1.7 bilyones sa awahing tala.

Lakip niining mga lugar diin naga-una ang pagpadala sa mga dolyar mao ang United States, Canada, Saudi Arabia, United Kingdom, Japan,United Arab Emirates, Singapore, Germany, Italy ug Norway.

Tungod niini, misalig ang BSP nga sa kanunay stable ang remittances sa dolyar nga gikan sa mga trabahanteng Filipino nga atua nagtrabaho sa gawas sa nasod, sumala usab sa datos nga gikan sa Philippine Overseas Employment Administration (POEA).

Sukad Enero rong tuig, mitala na ug 8.6 porsiyento sa pagsaka ang gipang-proceso nga mga job orders sa mga overseas Filipino workers. (PIA-Cebu/JSME)

==========

Mga traysikol draybers mihangyo nga mobalik sa paradahan sa Tabunok

By: Juju S. Manubag-Empuerto

CEBU CITY, Oktubre 26 (PIA) --  Mga drayber sa traysikol sa Tabunok sa Syudad sa Talisay mingadto kaganinang buntag sa buhatan sa Talisay City Information Officer nga si Arturo Bas aron sa paghangyo nga dili sila papahawaon sa pagparada sa ilalom sa flyover sa Tabunok tungod dakong kabalda ilang ginahimo sa trapiko.

Si Bas mipahibalo sa usa ka pahinabi sa PIA-Cebu nga ang mga traysikol gidid-an na nga moparada pa sa ilawom sa Tabunok flyover ug adto na kini sila ibalhin sa Barangay Lagtang kung asa nahimutang ang bag-ong merkado publiko sa dakbayan sa  Talisay.

Sumala pa ni Bas nga mihangyo ang mga drayber nga ibalik sila sa daan nilang paradahan nga mao ang dapit sa daang Tabunok Market.

Kahinumduman nga gitagaan sila ug duha ka adlaw nga makaparada sa ilalom sa Tabunok flyover sa mga kundisyon nga dili sila magpabadlong ug dili sila molapas sa gibutang nga cordon niini sa City of Talisay Traffic Operations and Development Authority (CITODA).

Matod pa ni Bas nga magtigom sila sa CITODA board uban ni Talisay City Socrates Fernandez ug nanghinaut siya nga adunay hukom nga makab-ot ug tugutan ang mga drayber sa traysikol sa ilang hangyo.

Sa laing paghinabi kang Girlie Bascon sa Public Information Office sa maong dakbayan misulti nga ang mga traysikol nga dili mopasakay ug moadto ug  Lagtang ug kadtong mga publikong pasaherong sakyanan nga ang ruta pa-Tabunok nga dili molahos ug Lagtang angay nga

kuhaon ang ilang mga numero sa plaka ug isumbong sa numero 512-3344 o kang Gerard Lariego kinsay monitoring head sa CITODA aron katagaan ug leksiyon. (PIA-Cebu/JSME)