Sugbo pormal na'ng sakop sa ITOP

by Amor Saludar

CEBU CITY Oktubre 5 (PIA) - Pormal na nga gidawat ang probinsya sa Sugbo isip miyembro sa Inter-islands Tourism Policy (ITOP) Forum nga gilangkuban sa island-province destinations sa tibuok kalibutan.

Nahimong pormal nga miyembro ang probinsya sa Sugbo atol sa gipahigayon nga 15th ITOP  Forum tinambongan   nila ni  Cebu Governor Gwendolyn Garcia ug Vice Governor Agnes Magpale didto sa Jeju Island, South Korea, niadtong  Septyimbre 28 - 30 ning tuiga.

Ang Sugbo nahimutang sa observation status diin giobsebaran ang probinsya ug ang dagan sa turismo niini sulod sa duha ka tuig sa dihang giimbitar si Garcia nga motambong niadtong 14th ITOP Forum didto sa Hainan, China.

Si Magpale sa iyang pagbalik dinhi sa nasud human sa forum nagkanayon nga ang ITOP adunay halapad nga scope kumpara East Asia Inter-Regional Tourism Forum (EATOF), diin miyembro usab ang probinsya.

Matud pa usab niya nga mas high –end ang ITOP ug nga dili lamang kini limitado sa mga  nasud sa silangang Asya.

Dugang pa ni Magpale nga nagtinguha usab ang grupo nga makig tap sa merkado sa US ug Europe.

Ang ubang mga probinsya nga sakop sa ITOP naglakip sa Jeju, South Korea; Hainan, China; Okinawa, Japan; Bali, Indonesia; Phuket, Thailand; Zanzibar, Tanzania; Hawaii, USA; Canary Islands, Spain; ug South Province, Sri Lanka.

Gitataw sa bise gobernadora nga ang naasoy’ng forum nga nagdala sa tema’ng “MICE Industry and Tourism Vision”,  gipunting sa conceptualization sa mga meetings, incentives, conventions ug exhibition, pinasikad sa taho nga matud pa ang mga nimimos ang gasto sa mga turista.

Nagkanayon si Magpale nga ang gilagdaan nga Joint Declaration sa maong forum naghatag og bili sa ka importante sa kooperasyon ug sa panag-ambitay og impormasyon alang sa kaayohan ug pag usbaw sa turismo sa mga miyembro’ng probinsya. (PIA-CEBU/AS)