Balaudnong magsilot sa mga oportunistang suplayer panahon sa katalagman gipasar sa senado

by Amor Saludar

CEBU CITY Oktubre 5 (PIA) - Gipasar sa senado ang balaudnon nga magsilot niadtong mga negosyante nga mopahimulos sa higayon pinaagi sa pagpaburot  sa presyo sa mga palaliton panahon sa katalagman.

Si Senador Manny Villar miduso sa Senate Billl No. 1306 nga nagdili sa grabeng pagpaburot sa presyo sa mga palaliton ug mga serbisyo niadtong mga lugar nga  labaw’ng naapektohan panahon sa katalagman.

Partikular nga gidili ang pagpaumento sa presyo sa mga palaliton sama sa parte sa ekipto mga serbisyo alang sa personal, pampamilya o pambalay nga katuyoan nga naglakip sa pagkaon, tubig, ice, chemical, building supply, mga kahimanan, produktong petrolyo, residential construction, reconstruction o repair service ug mga serbisyo aron pagtangtang sa mga debris.

Gikataho nga didto sa kaulohan nikabat ngadto sa P140 matag botelya ang presyo sa bottled water, partikular na didto sa Bulacan nga grabeng naapektohan sa bagyong Pedring.

Sumala pa ni Villar nga chairman usab sa Senate Committee on Trade and Commerce nga aron mapugngan kini nga kalihukan kinahanglan mapatuman ang balaod nga magsilot niadtong mopahimulos sa mga mamalitay panahon kalamidad.

Gikataho nga didto sa kaulohan nikabat ngadto sa P140 matag botelya ang presyo sa bottled water, partikular na didto sa Bulacan nga grabeng naapektohan sa bagyong Pedring.

Nagkanayon si Villar nga kung pun-an pa ang kalisud sa mga katawhan nga nakasinati og bagyo o bisan unsang kalamidad pinaagi sa pagpataas sa presyo sa mga palaliton, mosamot ang kalisud nga ilang nahiaguman ug hayan maglisud na sila pagbangon.

Ubos sa naasoy’ng balaudnon walay mga supplier nga gitugutang mopasaka sa presyo sa mga palatiton ug mga serbisyo sulod sa 180- day period human ang presidente nideklarar sa usa ka lugar nga ubos sa  “ major disaster.”

Ang makalapas ning maong akta mahimong mabilanggo ug dili molapas usa ka tuig ug mobayad usab sa multa nga P10,000.

Ang naasoy’ng akta nagmando usab sa pag establisar og toll- free hotline diin mahimong makatawag ang mga konsumidor sa insidente sa pagpausbaw sa presyo sa mga produkto ug serbisyo sa mga apektadong lugar, ingon  man ang pag-umol og programa nga magasilbing public information materials nga maghatag og ayuda sa mga residente unsaon pagdiparal ug paglikay sa illegal nga pagpausbaw sa  presyo sa mga produkto ug serbisyo o “price gouging.”

Ang maong balaudnon naghatag usab og direktiba sa Department of Trade and Industry sa pag sumiter og tinuig nga record sa kongreso kabahin sa mga reklamo sa “price gouging” nga ilang na imbestigar, nakompleto man o wala pa. (PIA-CEBU/AS)