Ka-importante sa Juvenile centers  alang sa mga kabatan-onan'g nahisala-ag

by Amor Saludar

 CEBU CITY Oktubre 11 (PIA) -- Pipila ka mga non-government organizations sa Sugbo nipadayag sa ilang sentimento unsa ka importante ang juvenile rehabilitation centers sa Central Visayas tungod sa naobserbaha’ng pagsaka sa gidaghanon sa mga kabatan-onan nga nakalapas sa balaod

.

Gitataw ni DSWD-7 child welfare and specialist, Emma Patalinghug nga sa tibook rehiyon siyete (7)  ang siyudad sa Sugbo, Dumaguete sa Negros Oriental, ingon man siyudad sa Tagbilaran sa Bohol lamang ang adunay mga sentro alang niadtong mga Children in Conflict with the Law (CICL), o mga kabataang nakalapas sa balaod.

Gitumbok ni Patalinghug nga ang balaod nagkinahanglan sa kada local government unit sa pag establisar og juvenile center. Kini iyang gipadayag niadtong miaging Sept. 24 nga episode sa Pagtuki, radio program sa RAFI nga padungog matag Sabado sa alas 10 hangtod alas 11 sa buntag sa estasyo’ng DYLA.

Samtang si Atty. Cheryl Cabutihan sa Child's Rights Protection Unit ug sa samang higayon coordinator sa proyekto’ng Children's Legal Bureau (CLB) nidugang nga gikinihanglan una’ng tubagon  sa kagamhanan ang kakuwangan sa mga juvenile centers sa nasud una pa ang pag amendar sa Juvenile Justice Act of 2006.

Sumala pa ni Cabutihan, nga angay’ng susihon kung nasunod ba sa nasud ang internasyonal nga  panag-ingnan lakip na niini ang pagmugna og insaktong juvenile centers. Si Cabutihan nahimo usab nga dinapit sa naasoy’ng programa.

Matud pa unsaon man sa pagtumbok nga ang Juvenile Justice Act of 2006 nga wala’y kapuslanan  kung wala usab matagai og kahigayonan kadtong mga kabatan-onan nga nahisalaag nga magbag-o pinaagi sa mga rehabilitation centers.  (PIA-CEBU/AS)