Gidaghanon sa turista sa Sugbo nisaka karong tuiga

Ni Amor Saludar

CEBU CITY October 24 (PIA) -- Ang Sugbo nitala og 11.33 nga pagsaka sa gidaghanon sa mga langyaw’ng bisita dinhi sugod Enero hangtud Agosto  ning tuiga, diin dako gihapon og gikatampo sa gidaghanon ang mga turista gikan sa  South Korea.

Base sa talaan sa Department of Tourism-Regional Office nikabat ngadto sa 1,313,316 ka mga langyaw ang nibisita sa Sugbo sulod sa nilabay’ng walo ka buwan ning tuiga, kumpara sa 1,179,699 sa sama gihapo’ng mga buwan sa niaging tuig.

Sumala pa ni DOT regional director Rowena,  kadaghanan sa mga turista nga bisita  sa nasud naggikan sa South Korea diin 44.49 percent o 250,353 ka mga langyaw’ng South Korean  ang nibisita sa nasud.

Laing mga  nag-unang tinubdan turista sa nasud mao ang Association of Southeast Nations, East Asia, South Asia, America, Oceania, Europe ingon man Middle East.

Gisundan kini sa nasud sa Japan  nga aduna’y 106,946 tourists o 19.01 percent ug Estados Unidos nga ma’y 50,613 tourists o 9 percent sa kinatibuk-ang gidaghanon sa mga turista’ng nipili sa nasud isip bakasyonan.

Ug aron pagdani og dugang pa’ng mga turista sa rehiyon gipangunahan ni Montecillo ang paglusad sa Tourism and Heritage Information Network o THINK-7,  isip parte sa kampanya sa turismo sa rehiyon, diin tuyo niini ang pag promote sa turismo sa Sugbo ug uban pa’ng parte sa tunga-tungang kabisay-an.

Matud pa niya ang THINK-7 usa ka pundok nga langkoban sa  mga manunulat ug reporters sa  business, opinion, region and travel  ubos sa mga local  nga media. (AS/PIA-CEBU)