Economic managers ni PNoy magtapok sa Sugbo alang sa kalambuan sa ekonomiya sa nasud 

by Amor Saludar 

CEBU CITY, Oct. 18 (PIA) -- Ang mga economic managers sa nasud magtapok unya sa Sugbo karo’ng umaabot Nobyimbre 4 alang sa Philippine Economic Briefing aron sa paghatag og subay sa publiko kabahin sa mga bag-ong kalambuan ug inasyatibo ubos sa administrasyo’ng Aquino alang sa paspas nga paglambo sa nasud. 

Ang mga kalihim sa Department of Finance, Department of Budget and Management, Department of Trade and Industry, National Economic and Development Authority ug ang Governor sa Bangko Sentral ng Pilipinas aduna unya’y kaugalingo’ng presentasyon sa ekonomikanho’ng panglantaw sa nasud, labaw sa tanan. 

Ubos sa tema’ng “The Philippines: Reaching for Investment Grade through Good Governance,” kini magpunting unya sa pagpahibalo sa mga inasyatibo sa gobyerno ngadto ug alang sa maayo nga ekonomikanho’ng pangagamhanan. 

Human unya sa briefing isunod gilayon ang press conference. (PIA-CEBU/AS) 

============= 

CENTCOM wala’y natala’ng kalapasan sa tawhano’ng katungod sulod sa nuybe ka bulan 

by Amor Saludar 

CEBU CITY October 20 (PIA) -- Ang Armed Forces of the Philippines - Central Command (AFP- CentCom) wala’y natalang kaso sa pang-abuso sa tawhanon katungod gikan Enero hangtud Septyimbre ning tuiga, dako’g kalabutan niini ang paghatag og prayoridad sa padayong dayalogo alang sa kalinaw ug pag sagop sa “Bayanihan,” kay sa pakig giyera. 

Mao kini ang gibutyag ni AFP-CentCom Public Information Officer Lt. Col. Christopher C. Tampus atol sa gipahigayon nga AGIO Forum bag-ohay lamang diin naghisgot kabahin sa kalamboan sa insurhensya sa rehiyon. 

Sumala pa ni Tampus nga ila na nga gipahimangnuan ang ilang mga tawo nga anaa sa operasyon nga kanuna’y mag amping ug dilimolapas sa tawhano’ng katungod sa mga tawo lakip na niadtong gikatahapan nga mga rebeldeng komunista. 

Gitataw usab niya nga prayoridad karon sa administrasyo’ng Aquino nga aron makab-ot ang hataas nga kalinaw ipadayon ang peace negotiations tali sa mga komunistang pundok ug pasiugdahan ang panaghiusa. 

Gipasabot ni Tampus nga sa pagka karon labaw nila’ng gitotukan ang peace talks kaysa pagpakig gubat ug gipalambo ang Bayanihan nga nagdasig sa mga Filipino sa paghiusa ingon man gipasiugdahan usab nila ang kampanya nga nagpakita sa kamahinungdanon sa pagtahod sa tawha;ng katungod mao nga wala’y bisan usa sa ilang mga kawani ang nakalapas niini. 

Dugang pa niya nga sa pagpahigayon og operatiba ilang gisiguro nga dili ma sakripisyo ang mga civilian ug nga sa kanunay hatagan og bili ang katungod ug dignidad niining mga tawhana bisan pa man og sila ang puntariya sa operasyon sa mga militar. 

Sumala pa ni Tampus nga sa nanglabay mga katuigan sila nakakab-ot na og ubay-ubay nga mga kalampusan sa ilang mga operasyon pagpakigubat sa mga komunista, apan sa pagkakaron si Presidente Aquino hugtano’ng ninghatag og emphasis nga gikinahanglan gayud nga anaa ang panagsabot- sabot alang sa kalinaw ug tagaan og igong gibug-aton ang Bayanihan, ilakip na usab niini kadtong grupo sa mga walhon aron makab-ot ang hataas nga kalinaw. (AS/PIA-Cebu)