29 ka mga batan-ong pinoy mosalmot sa SSEAYP-Japan

by Amor Saludar

CEBU CITY Oktubre 17 (PIA) -- 29 ka mga Filipino young leaders ang morepresentar sa Pilipinas isip Philippine youth ambassadors sa pagahimoo’ng 38th Ship for Southeast Asian Youth Program (SSEAYP).

Kapin sa 300 ka mga batan-ong delegado gikan sa Japan ug sa uban pa’ng 10 ka mga estado nga sakop sa ASEAN, ang gipaabot nga mosalmot ni’ng maong programa aron sa pagpasiugda ug paglig-on sa panaghigalaay ingon man kulturanho’ng pagsinabtanay sa mga nasud nga nahisakop sa ASEAN.

Ang SSEAYP usa ka diplomatikanhon ug kutural nga panagbayloay og programa tali sa mga kasamtangang youth leaders sa Asya, nga gipaluyohan sa kagamhanan sa Japan.

 Sulod sa 52 ka adlaw ang mga delegado  isakay sa cruise liner MS Fuji Maru gikan sa Oktubre 26 hangtud Disyembre 16, ‘ning tuiga ug sila mobisita sa nasud sa Japan, Kaulohan dinhi sa Pilipinas, Muara sa nasud sa Brunei Darussalam, Jakarta sa Indonesia, Port Klang sa nasud sa Malaysia ug Ho Chi Minh sa Vietnam.

Base sa taho gikan sa Natonal Youth Commission (NYC) talagsaon ang iteneraryo sa SSEAYP karong tuiga sanglit   usa sa mga port of calls o nasud nga dungguan ninii mao ang Pilipinas ingon man dinhi usab pagahimoon sa nasud ang First Country Programme nga mopaila sa “PintigPinoy” ang grupo gikan sa Pilipinas.

Atol sa port of calls ang mga delegado makighugpong sa mga kabatan-onan diri sa nasud og mopaubos sa home-stay program.

Mosanong usab sila sa courtesy calls sa mga dignitaries,ug mohimo usab sila og institusyonal nga pagbisita aron sila makakat-on pag-ayo sa kultura ug tradisyon sa Southeast Asian.

Ang Pilipinas magsilbing venue sa  first Country Program sanglit mao man usab kini ang unang port call sa naasoy’ng barko.

Niining higayona ang contingent sa Pilipinas nga gitawag og “PintigPinoy” uban sa mga kaalyado niini nga nag gikan sa habig sa kagamhanan ug publikong sektor, matagaan og kahigayonan nga ikapasundayag ang  kultura ug mga kabilin ingon man kalambuan sa industriya sa nasud.

Aron pagsiguro nga duna’y igong preparasyon isip representante sa nasud ang “PintigPinoy” mapaubos sa usa ka buwan nga sunod-sunod nga mga seminars, trainings ug uban pa nga mga pagpangandam nga ipunting sa  diplomatic affairs, youth leadership, personal development ug social decorum,ingon man kultura ug sining isip pagpangandam sa mahitabong  panagbayloay og kulturanhong diskusyon sa  panahon nga maglawig sila sa kadagatan.

Ang “PintigPinoy” mag-andam usab og mga basahon gikan sa Pilipinas, diin nagpadayag sa maayong binuhatan sa nasud sa habig sa edukasyon, kalambuan sa mga kabatan-onan ug kultura labaw sa tanan.

Ang opisyal nga delegado sa Pilipinas uban sa ilang National Leader gipili sa Office of the President pinaagi sa National Youth Commission. (PIA-CEBU/AS)