Balaodnon alang sa seguridad sa mga nagserbisyo ubos sa gobyerno aprobado na

by Amor Saludar

CEBU CITY Oktubre 14 (PIA) -- Giaprobahan na sa senado ang Senate Bill 2875 nga naghatag og seguridad sa termino sa tanang mga casual ug  contractual  government employees, nga nagserbisyo sa gobyerno sulod na sa taas taas nga panahon.

Base sa nahisgutang balaodnon nga gipangamahanan ni Senator Antonio "Sonny" Trillanes IV, ang chairman sa Senate Committee on Civil Service and Government Reorganization kini maghatag og seguridad niadtong mga contractual ug  mga casual nga empleyado nga padayong nagserbisyo sa national government sulod na sa lima ka tuig. 

 Kadtong padayong nagserbisyo sulod na sa 10 ka tuig ubos sa local government units matagaan gihapon og seguridad sa ilang pagpanerbisyo pinaagi sa paghatag kanila og "co-terminus with the incumbent or CTI status."

Matud pa ni Trillanes nga siya nagtuo nga kadtong mga casual ug contractual nga empleyado diin naghatag og dedikasyon sa ilang pagserbisyo sa kagamhanan ug sa publiko sulod sa dugay na nga panahon angay lamang matagaan og seguridad sa ilang termino isip empleyado tungod kay  kini katungod  sa tawo dili lamang sa habig sa pamuo kundili nahasulat usab kini sa 1987 Constitution."

Samtang subay ning maong kalambuan giaprobahan na usab sa senado ang SBN 2946  ubos gihapon sa pangama ni Senator Trillanes, kinsa nagmando sa paghatag og eligibility equivalent sa Career Service Professional Eligibility niadtong mga sakop Sangguniang Bayan, Sangguniang Panglungsod ingon man Sangguniang Panlalawigan nga nagserbisyo sa publiko og kinatibuk-ang siyam ka tuig apan gikinahanglan nga sila gradwado sa bisan unsang bachelor's degree sa kolehiyo.

Kadtong mga sakop usab sa Sanggunian nga nagserbisyo og kinatibuk-ang unom ka tuig pagatagaan og eligibility equivalent sa Career Service Sub-Professional Eligibility, kung sila nakakuha og 72 units sa bisan unsang baccalaureate degree program sa kolehiyo. (PIA-CEBU/AS)