Subsidiya alang sa gaymay’ng mag-uuma , mangingisda gipagawas na

Ni: Amor Saludar

CEBU CITY Septyimbre 21 (PIA) - Gipagawas na sa administrasyong Aquino ang P2.86 bilyones nga pundo isip rice subsidy program alang sa kapin usa ka milyon ka benepisaryong mga gaymay’ng mangingisda ug mag-uuma sa tibuok nasud.

Ang naasoy’ng programa  nga gisugdan niadtong miaging Mayo ning tuiga ug gilauman nga makompleto  sa katapusan sa buwan sa Septyimbre usa ka pagpanginlabot sa gobyerno ngadto sa mga mag-uuma  ug mangingisda ingon man sa ilang pamilya aron sila matabangan nga makasugakod sa epekto sa pagsaka sa  presyo sa mga palaliton ug sa mga produktong lana.

Ubos ning maong programa ang mga benipisaryo makadawat og ayudang pinansiyal isip bugti sa ilang pagsalmot  sa upat ka adlaw  nga training ug pagserbisyo sa komunidad.

Ang upat ka adlaw nga training gipunting sa pagpanguma ug paggama og pagkaon, pag-andam sa mga pamilya og komunidad panahon sa katalagman, gender and development orientation ug ang insaktong pamaagi sa pagtanom  og mais , humay ug uban pang mga lagotmon. 

Ang pagpatigayon sa naasoy’ng training inabagan sa Department of Agriculture, Department of Environment and Natural Resources ug mga local government units.

Human sa training ang mga benipisaryo moserbisyo sa komunidad ubos sa cash-for-work nga paagi sulod sa pito ka adlaw dungan sa pagpananom og kahoy, reforestation,  pagpanglimpyo sa baybayon,pagkubkub og mag agianan sa tubig ug mga kanals, pagpang-ayo sa nagubang pasilidad sa mga komunidad gumikan sa mga katalagman.

Kadtong mga benipisaryo nga makakompleto sa tanang mga kalihukan makadawat og ayudang pinansyal pinasikad sa gipatumang suholan sa mga lugar diin sila nahisakop.

Gibutyag ni Acting Social Welfare Secretary Alicia Bala nga 50 porsyento sa ayudang pinansyal gamiton  sa pagpalit og pagkaon niadtong mga benipisaryo.

Ang nahisgutang programa adunay budget nga P4.2 bilyones alang sa mga gagmay’ng mag-uuma ug mangingisda kinsa pillion pinaagi sa proyekto sa DSWD National Household Targeting System for Poverty Reduction (NHTS-PR). (PIA-CEBU/AS)

===========

Nasud sa Japan motampo og malinawong lakang aron masumpo ang kasungian sa Spratly 

Ni: Amor Saludar

CEBU CITY Septyimbre 21 (PIA) - Gibutyag sa  Japanese ambassador sa Pilipinas Toshinao Urabe nga aduna unya’y mahitabong panagbayloay og  suwat tali sa Pilipinas ug Tsina aron pagahisgutan ang solusyon sa kasungian sa teretoryong  West Philippine Sea ug South China.

Giangkon ni Urabe nga ang duha ka gobyerno maghisgut unya sa politikanyong tensiyon sa gitigiang Spratly Islands sa pagduaw unya ni Presidente Aquino sa Japan karong umaabot Septyimbre 25 hangtud 28 ning tuiga.

Dugang pa niya nga ilang susihon kun unsay ilang mahimo aron makab-ot ang malinawong resolusyon  ubos sa international system pinasubay sa balaod nga international.

Sumala pa ni Urabe nga interesado usab ang Japan nga mamintenar ang kalinaw ug kalig-on sa panaghisgot hisgot kabahin sa Spratly Island ug nga buot usab sa maong nasud nga makita ang code of conduct sa legal nga pagkahan-ay.

Dugang pa sa ambassador nga  gihangop usab sa nasud sa Japan ang pagkaumol sa mga giya alang sa pag implementar sa naasoyng kalagdaan.

Matud pa usab ni Urabe nga nagpabiling lig-on ang gobyerno sa Japan sa pagkab-ot og malinawong resolusyon nga makahatg og kasiguro-an nga adunay kagawasan ang mga rota sa kadagatan.

Apan gibutyag niya nga ang pagsanong sa gobyernong Hapon sa Pilipinas nagpadayag nga ang maong kasungian angayang husayon sulod lamang sa probisyon sa kasamtangang international nga balaod sa panakayan ug nga wala nagpasabot nga ang Tokyo nidapig sa Pilipinas.

Dugang pa niya nga ang China magpabiling usa ka importanteng katimbang sa Japan ug Pilipinas  ug ang tumong sa Tokyo mao lamang ang pagsiguro nga magpadayon ang ekonominkanhong kalihukan tali sa tulo ka mga nasud. (PIA-Cebu/AS)