Pag-ibig fund: mandato na ang pagpa-miyembro niini 

ni : Juju S. Manubag-Empuerto

CEBU CITY. Sept 20 (PIA)--- Ang pagpa-miyembro sa Pag-ibig Fund hugot gimando sumala sa Akta Republika 9679 nga gipalusad niadtong Enero 10, 2010.

Mao kini ang pamahayag ni Van Pepito, Member Services Officer 4 sa Pag-ibig Fund Cebu South sa usa ka pahinabi sa PIA-Cebu.

Miingon si Pepito ubos sa maong balaod, tanang empleyado nga anaa sa pribado ug gobyerno, mga unipormado nga kawani sa Armed Forces of the Philippines kon (AFP) Philippine National Police kon (PNP), Bureau of Fire Protection (BFP), Bureau of Jail Management & Penology (BJMP), Overseas Filipinos Workers (OFWs) ug mga trabahante lakip ang mga katabang sa panimalay, drayber, tindera ug mga self-employed nga nagadawat ug suholan nga dili moubos sa P1,000 gi-mandoan nga ipasakop sa Pag-ibig Fund.

Dungag ni Pepito nga kadtong naga-swedo ubos sa mil kinyentos, kuhaan ug usa ka porsiyento sa ilang sweldo isip personal nga tampo ug ang ilang agalon mohatag usab ug dos porsiyento isip kaatbang nga tampo.

Samtang kadtong nagsweldo ug mil kinyentos pasaka, ang kuhaon sa ilang sweldo isip personal nilang tampo sa Pag-ibig fund kay dos porsiyento ug ang ila usab nga agalon mohatag ug kaatbang nga tampo nga dos porsiyento.

Sumala pa sa gimando sa balaod, P5,000 ang kinatas-ang suholan nga basehan alang sa tampo sa magpasakop sa Pag-ibig fund.

Ang mga agalon nga dili motuman sa balaod silutan ug tres porsiyento kada bulan nga multa alang sa kantidad nga bayranan. Ang mopakyas sa pagtuman sa Akta Republika 9679 mahimong mapriso sa dili molabaw ug unom ka tuig o kaha ang duha (multa ug priso pa gyod).

Ang agalon gisugo usab sa paghatag sa gikinahanglang atbang nga tampo ug sa pagbayad niini uban sa tampo sa empleyado ngadto sa Pag-ibig fund.

Alang usab sa dugang kasayuran, ang Pagibig fund sa sangang buhatan sa Mandaue mobalhin sa bag-ong opisina karong Oktubre 3 sa ikatulo ug ika-upat nga andana sa W.T.Tower bldg diin nahimutangan usab sa Pag-ibig Cebu south nga naa sa una ug ikaduhang andana sa maong  bilding.

Ang Pag-ibig Fund Mandaue serado sa Septembre 29 ug 30 alang sa pagpamalhin sumala sa gipahibalo ni Dale Mark Antonio ang Information Officer sa Pagibig Fund Mandaue City branch. (PIA-Cebu)

============

'Piso-Piso' nga kampanya alang sa mga batang Badjao gilunsad sa Sugbo 

By: Amor Saludar

CEBU CITY Septyimbre 20 (PIA) -- Gilunsad dili pa lang dugay pinaagi sa usa ka makalingaw nga duwa ug mga lamiang pagkaon ang kampanyang  “Piso-Piso Para sa Batang Sugbo” alang sa  mga kabataang Badjao  sa Mambaling, siyudad sa Sugbo.

Ang maong kampanya nga gi organisar sa Jollibee Foods Corp. ug Department of Social Welfare and Development (DSWD 7) gitumong aron pag-agni sa mga pamilyang Badjao nga nakabinipisyo pinaagi sa ayudang pinansyal sa Pantawid Pamilyang Pilipino Program sa pagtuman sa mga kondisyones niini.

Human sa maong kalihukan didto sa Mambaling Gym,nikabat ngadto sa 100  ka mga kabataang Badjao uban sa ilang mga ginkanan ang nakaangakon og libreng medical services gikan  saCebu City Medical Center (CCMC).

Mga representante gikan sa CCMC nipahigayon usab og seminar kabahin sa dengue ug sa insaktong pagatiman ug paglimpyo sa lawas sa tawo, samtang ang DSWD 7 niapod apod og sapot ngadto sa mga pamilyang Badjao.

Samtang subay niini mga trabahente sa ubang mga Jollibee outlet dinhi sa Sugbo nagtampotampo aron makatigum og salapi isip sa suporta sa kampanyang “Piso-piso para sa Batang Sugbo.

Gibutyag ni Rhys Gabato representante gikan sa Jollibee Food Corp. nga gikinahanglan nga suportaan  ug tagaan og importansya ang komunidad sa mga Badjao dinhi sa Sugbo.

Matud pa usab ni Aileen Lariba ang information officer sa DSWD 7 ang maong kampanya pinasubay  sa public private partnership  usa sa gihingusgan sa administrasyong Aquino.

Dugang pa ni Lariba nga nihatag na sa ilang pagtagad ang mga pribadong sektor ngadto sa mga komunidad nga nagkinahanglan kaayo og suporta. (PIA –CEBU/AS)