Liga ng mga barangay sa Sugbo motabang pagsumpo sa human trafficking

Ni: Amor Saludar

CEBU CITY Septyimbre 19 (PIA) -- Nipadayag ang Liga ng mga Barangay sa ila usab nga tinguha pag-abag sa kampanya batok human trafficking, human ang mga opisyales sa Sangguniang Kabataan sa probinsya sa Sugbo nisanong sa hagit sa samang kampanya.

Sumala pa ni Provincial Board Member Jose Ribomapil Holganza, Jr  ang pangulo sa Liga  ng mga Barangay sa probinsya nga sulod sa duha ka buwan ang ilang asosasyon  mohimo og pagbisita sa matag barangay ingon man location registry nga mag-awhag sa tanang residente sa pagsulat sa nahimutangan ug uban pang mga detalye sa ilang mga miyembro o  kabanay nga nahilayo sa panimalay.

Atol sa pag lunsad sa kalihukan nga Movement of Anti-Trafficking Advocates (MATA) dili pa lang dugay didto sa Cebu International Convention Center gibutyag  ni Holganza nga ang ilang pundok nagtinguha pag-awhag  sa mga ginikanan sa monitor kanunay sa ilang mga anak ug sa pagtaho gilayon sa awtoridad kun ugaling mawagtangan sila’g komunikasyon niini.

Gipamulong ni Holganza nga ila kining himoon uban sa mga SKs ngadto sa barangay nga adunay populasyon nga kapin sa 5,000.

Giangkon usab sa naasoy’ng opisyal nga gikinahanglan kaayo ang halapad nga pundok alang niadtong mga barangay nga aduunay kapin 5,000 ka mga residente.

Dugang pa ni Holganza  pinaagi sa mga non- government organization sama sa MATA, Visayan Forum, International Justice Mission ug mga pundok sa gobyerno sama sa  Cebu Women’s Commission ug mga kaayado niining  sama sa gobyerno sa Estados Unidos ug USAID mabuntog ra sa mga lider sa barangay ang human trafficking dinhi sa Sugbo. (PIA-Cebu/mbcn/AS)

===========

Kabatan-onan sa Sugbo naghugpong batok human trafficking 

Ni:Amor Saludar 

CEBU CITY Septyimbre 19 (PIA) - Ang mga kabatan-onan sa Sugbo maghugpong pagsumpo sa human trafficking ug pagpapas sa imahen sa probinsya isip hotspot sa operasyon sa trafficking.

Ang Sangguniang Kabataan (SK) sa Sugbo ug Movement of Anti-Trafficking Advocates (MATA), usa ka grupo sa mga kabatan-onan nga gi organisar sa Visayan Forum Foundation maghiusa sa pagsanta ug pagtaho sa mga kaso sa trafficking sa ilang tagsa tagsa ka lugar.

 Gilunsad ang nahisgutang pundok niadtong September 16, 2011 sa Cebu International Convention Center sa ala una sa hapon.

Si US Ambassador Harry Thomas maoy nagsilbing Keynote Speaker sa paglunsad sa nahisgutang pundok. Mipasupot usab sa iyang mensahe si Gov. Gwen Garcia ug sa samang higayon itunol usab ngadto sa gobernadora ang plaque isip pag-ila sa iyang pagpangulo batok human trafficking sa probinsya.

Ang tanang SK units sa probinsya sa Sugbo mitigum sa mga kabatan-onan  ug modisenyo og mga programa nga mopahimatngon sa mga kabatan-onan kabahin sa issue sa trafficking ingon man sa pag sumpo, pagdiparal ug pagtaho og mga kaso sa human trafficking dinhi sa probinsya.

Kapin 1,000 ka mga youth leaders ang gitahasan sa pag implementar og mga education campaigns, pagpanalipod sa mga komunidad ug mga tulunghaan batok mga traffickers ingon man pagpakidugtong sa mga tigpatuman sa balaod pinaagi sa pagtaho kun adunay nahibaw-an nga trafficking operations.

Nagkanayon ang Founder ug Executive Director sa Visayan Forum Foundation, Ma. Cecilia Flores-Oebanda, nga ang mga kabatan-onan sa Sugbo wala gayod nisagop sa mga eksploytasyon himali na gayod sa human trafficking sa probinsya ug nga dili ikasorpresa nga  si Provincial Gov. Gwendolyn Garcia mismo maoy nangulo sa kawsa batok trafficking uban sa mga SK youth.

Dugang  pa ni Oebanda nga ang panagtambayayong sa MATA ug SK Cebu importante kaayo tungod kay gumikan niini mapaabot ngadto sa mga kabatan-onan ang mga importanteng impormasyon aron sila malikay sa human trafficking conditions, ingon man aron sila gikan sa pagkabiktima ngadto na sa pagka instrument alang sa maayong kausaban.

Gikataho nga sayo ning tuiga pinaagi sa ilang Executive Board ug ni Provincial Gov. Gwendolyn Garcia ingon man ang Visayan Forum Foundation nimugna og 3-Phase Action Plan aron pag implementar og adbokasiya sa Anti-Human Trafficking sa kumonidad nga  inapilan sa tanang SK leaders sa 56 ka munisipalidad ug 1,203 ka barangays.

Niadtong miaging hunyo ning tuiga si SK Federation President Aladin Caminero nipirma og usa ka a Memorandum of Agreement (MOA) uban sa mga Founder ug Executive Director sa Visayan Forum Foundation, Ma. Cecilia Flores-Oebanda,  aron mamahimong pormal ang  ilang pasalig sa pagsagop sa MATA sa tanan SK network dinhi  sa Sugbo.

Sumala pa sa kadagkuan sa naasoy’ng pundok ang MATA usa  ka adbokasiya sa anti-trafficking nga gitumong aron motibar og pag-agni  sa mga kabatan-onan nga mamahimong tingog niadtong mga walay ikasarang nga mga biktima sa human trafficking dinhi sa nasud.

Gilauman usab sa grupo nga mamahimo untang mga igmat nga mata ug tigpaniid ang mag kabatan-onan batok trafficking sa mga tulunghaan ug kumonidad.

 Kini nga kalihukan parte sa kampanya sa mga kabatan-onan tibook nasud nga gitawag og Traffick Jam nga nahimong posible gumikan sa suporta sa US Agency for International Development (USAID). (PIA-Cebu/mbcn/AS