Proyekto gilunsad, nag-awhag sa kabatan-onan pagpakabana

LARENA, Siquijor, September 16 (PIA) -- Gilunsad sa munisipalidad sa Larena karong buwana ang programang integrated solid waste management kun gitawag nga “Zero-Waste Larena”kampanya nga gilangkoban sa mga nag-unang barangay sa Helen, North ug South Poblacion, Bontod, Cangbagsa ug Nonoc.

Atol sa paglunsad sa naasoy’ng programa nihatag og kamanduan si Municipal Mayor Gold L. Calibo ngadto sa mga kabatan-onan sa pagsalmot sa maong kampanya.

Gibutyag na Calibo nga ang maong proyekto dili mahuman sulod lamang sa usa ka gabii, o usa ka buwan o tuig apan kung ang tanan panginlabot siguradong makab-ot ang kalampusan.

“Mao nga gihangyo ko kamong mga kabataan sa pakuyog ug pagtabang aron ang atong lungsod mamahimong limpyo ug maanindot,” matud pa ni Calibo.

Dugang pa niya nga ang limpyo nga kalikopan maka minos sa dautang epekto sa climate change ug makahatag og luwas nga hangin diin importante kaayo alang sa baskog ug himsog nga panglawas sa tawo.

Sa laing bahin gitataw ni Provincial Environment and Natural Resources Officer Antonio T. Cabrido, nga ang mga kabatan-onan maoy maayong ekipto sa promosyon ug adaptasyon ning maong proyekto.

Matud pa niya nga sa lawak saringanan ang mga magtutudlo mopakita sa insaktong pamaagi unsaon paglabay sa basura ug kani nga paagi unya ang sundon sa mga kabataan.

Nagkanayon si Cabrido nga katungdanan sa mga hamtong ang pagtudlo ug pagpaila sa mga kabatan-onan sa ilang papel sa sayong pangidaron pa lang.

Gipangulohan nila ni PENRO Cabrido ug Mayor Calibo ang pagpirma sa kasulatan alang sa Zero-Waste Larena. Ang mga tinun-an sa Siquijor State College, Saint Vincent Academy, UCCP Learning Center ug Larena Primary School uban sa mga pangulo sa barangay ug mga konsehales nga naglangkob sa Metro Larena nitambong usab sa maong kalihukan. (PIA-CEBU/mbcn/AS

===========

Administrasyong Aquino mopatin-aw sa subay sa buhisan sa mga minahan

By: Amor Saludar

CEBU CITY Septyembre 15 (PIA)- Mohimo ug lakang ang administrasyong Aquino aron pag siguro nga makabenipisyo ang kinabag-an ug mosulod sa panudlanan sa gobyerno sa nasud ang ginansiyang salapi gikan sa mga minahan.

Sa gipahigayon nga Mining Philippines 2011 Conference and Exhibition kagahapon didto sa Pasay City sa kaulohan gibutyag ni Executive Secretary Paquito N. Ochoa Jr nga ang nasud adunay intension nga mo apply sa compliance status sa Extractive Industry Transparency Initiative (EITI) nga nagbase sa London aron makatampo sa pagkab-ot sa gikinahanglan kaayong reporma sa sa industriya sa mining dinhi sa nasud. 

Ang EITI usa ka kalibotanhon inasyatibo nga nagkinahanglan sa mga entrante niining gobyerno sa pag taho ngadto sa publiko sa kita nga ilang natigom gikan sa buhis sa mga kompaniya ug sa samang paagi kinahanglang motaho usab kadtong mga kompaniya sa buhis nga ilang nabayad ngadto sa gobyerno. Sa ingon niini nga paagi tin-aw ug klaro ang proseso sa pagsubay sa buhis niadtong nalambigit nga mga kompaniya.

Matud pa ni Ochoa nga nag-una sa ilang agenda ang paghatag og katin-awan sa mga buhis gikan sa mga minahan tungod kay gikinahanglan kini aron pag determinar sa natampo sa maong industriya alang sa kalamboan sa nasud.

Dugang pa niya nga dugang reporma pa ang gikinahanglan aron mosaka pa ang kahimtang sa mga minahan ug pabatyagan ang impak niini isip yawe sa ekonomokanhon kauswagan sa nasud.

Ang mga datos gikan sa Department of Environment and Natural Resources nagpakita nga ang mga minahan nakatampo og P110 billion sa kinatibuk-ang kita gikan sa mga produkto sa nasud ug P12.5 billion usab ang natampo niining buhis, royalties ug bayad ngadto sa gobyerno sa milabay’ng tuig.

Matud ni Ochoa nga ang kandidatora ug ang umaabot unya nga pagkamyembro sa nasud sa EITI pinasubay sa panglantaw alang sa maayong pangagamhanan sa administrasyong Aquino.

Gitataw niya nga usa unya ka lig-on nga manipesto ang paghatag og katin-awan sa buhis nga natigom sa gobyerno gikan sa kalamboan sa mga mineral resources sa nasud ug gi unsa kini pagpahimulos sa publiko. (PIA-Cebu/mbcn/AS)