Philhealth Privilege Cards ipang-apod-apod na

ni : Juju S. Manubag-Empuerto

CEBU CITY. Sept 22 (PIA)-- Ang PhilHealth Privilege Cards ipang-apod apod na dinhi sa Central Visayas sugod karong Septembre 26 didto sa SM City Cebu. 

Matid pa sa PhilHealth-7 public relations officer nga si Dina Cinchez, ang mga cards makuha sa mga bayad centers sama sa Ebiz, USSC ug RCPI sa kantidad nga P60 didto sa SM ug P58 ngadto sa mga bayad centers nga anaa mahimutang sa ubang bahin sa Sugbu.

Si Cinchez miingon sa bag-o lang nga gipahigayon nga porum sa PIA-Cebu nga ang Philhealth privilege cards adunay daghang mga pribilihiyo, padasig ug mga diskwento sa mga nisalmot nga mga komersyal nga establisimento sa tibuok nasod.

Dugang usab ni Cinchez nga ang mga miyembro sa Philhealth nga makabaton sa bag-ong Philhealth Privilege card kay adunay katungod sa diyes ngadto sa 60 porsiyento nga diskwento diha sa mga Watson ug Rose Pharmacy.

Si Atty Karina Agraviador nga usa usab nga PRO sa Philhealth nisulti nga ang makapahimulos sa maong mga diskwento kay kadto lamang mga miyembro sa Philhealth nga aktibo ang ilang pagpasakop.

Sa gikasulti sa presidente sa Philhealth nga si Dr Rey Aquino, ang bag-ong ipagawas nga Philhealth privilege card  nagtinguha nga malapdan ang pagpasakop sa ahensiya ug na-uyon sa pagkab-ot sa tuyo sa gobyerno nga Universal Health Care sa tuig 2013.

Busa kadtong dili pa miyembro sa Philhealth, moadto lamang karong Lunes sa SM City Cebu ug sa mga bayad centers ug magdala ug P300 lakip na ang mga birth certificates sa magpasakop ug sa mga dependents, marriage certificate kung minyo ug ang P60 nga kantidad sa card diha sa SM. (PIA-Cebu)