Mga 'scholarships' gikan sa DOST

ni Juju S. Manubag-Empuerto

CEBU CITY. September 26 (PIA) --- Ang Department of Science and Technology (DOST) pinaagi sa Science Education Institute (SEI) nagadawat na ug mga aplikasyon alang sa ilang Science & Technology nga scholarship alang sa 2012-2013 sulod sa RA-7687 Scholarship Program A ug ang Merit Scholarship programa B.

Ang duha ka scholarship sa DOST bukas sa mga tinun-an nga mogradwar sa hayskol ug buot mokuha ug batsilyer nga titulo sa prayoridad nga mga kurso sa siyensa, matematika ug engineering. 

Ang programa A  alang sa pobre; utokan ug pagkatakos nga mga tinun-an nga ang adunay tinuig nga kinitaan sa tibuok banay nga P166T ug ubos pa.

Samtang kadtong labaw pa niini nga tinuig nga kinitaan sa tibuok banay, mahimong mo-aplay sa program B.

Ang tanang aplikante gikinahanglan nga anaa sa nag-una nga singko porsieyento sa gradweting klas o kaha miyembro sa gradweting klas sa DOST-SEI o DepEd nga nailhang science hayskol ug sirtipikado sa prinsipal sa tunghaan.

Ug kini sila wala pa makakuha ug mga units sa kolehiyo ni makakuha kaniadto sa mao nga eksaminasyon; usa ka Pilipino nga citizen nga walay pending nga aplikasyon aron molangyaw; himsog sa pisikal ug pangutok; maligdong ug lumulopyo sa lugar sulod sa 4 ka tuig.

Tanang aplikasyon uban ang mga rekisitos kinahanglan madawat sa rehiyonal nga buhatan sa DOST diha sa Sudlon, Lahug, Cebu City sa dili pa ang Oktubre 21 o sa Oktubre 21 mismo.

Pagakolektahan ug P200 ang mga aplikante sa programa B inig duso sa ilang aplikasyon.

Ang qualifying examination pagadumalaon tibuok nasod sa Nobyembre 20, 2011, adlaw nga Dominggo. (PIA-Cebu/jsme)

========== 

DSWD nipagawas ug P331.7M nga pundo alang sa mga mag-uuma ug mangingisda 

CEBU CITY Septyimbre 26 (PIA) - Nikabat ngadto sa P331.7 milyones ang gipagawas nga pundo sa Department of Social Welfare and Development (DSWD-7) isip subsidiya alang sa pagkaon sa mga mag-uuma ug mangingisda dinhi sa Central Visayas.

Gitataw ni DSWD-7 regional director Ma. Evelyn Macapobre nga tungod niini nga pundo madugangan ang kita sa mga benepisaryo ug sa samang higayon magdasig usab kini sa komunidad sa pagsalmot sa mga aktibidades panahon ug human sa mga katalagman lakip na niini ang pagpakunhod sa kagutom ug inasyatibong seguridad sa pagkaon.

Dugang pa ni Macapobre kini gitumong aron paghatag og  temporaryong trabaho niadtong mga mag-uuma ug mangngisda ingon man sa ilang pamilya nga napoblema ug nanginahanglan og ayuda sa pagpahigayon og mga proyekto ug uban pang kalihukan nga magpakunhod sa karisgo sa ilang mga komunidad.

Sumala pa niya tungod niini nga ayuda ang mga benipisyaryo makahimo sa pagpausbaw sa produksyon sa ilang mga pagkaon pinaagi sa pag preparar sa ilang mga kaumahan, pagmugna ug pag-ayo sa  mga irigasyon ingon man dugang kita alang sa rehabilitasyon sa mga kalsada, pagtukod ug pag-ayo sa mga  lawak saringan ug day care centers.

Base sa tibook budget nga gialokar sa DSWD-7 dinhi sa tunga tungang kabisay-an ang munisipalidad sa Mabinay, Negros Oriental maoy nakakuha og dakong pahat nga P13.104.814M diin duol sa 4,462 ang mag benepisyaryo niini.

Dinhi sa tunga tungang kabisay-an kini nga proyekto nakahatag na og kaayohan sa mokabat 112,939 ka mga ginagmay’ng mag-uuma ug mangingisda. (PIA-CEBU/Amor Saludar)

=========== 

Gihingusgang kampanya batok mga malapason sa trapiko gipasar sa hunta

by Amor Saludar

CEBU CITY Septyimbre 26 (PIA) - Giawhag  sa hunta probinsyal sa Sugbo ang Land Transportation Office (LTO) ug mga kaubang ahensya niini nga hingusgan ang pagpahigayon og random checkpoints  sa mga probinsya ug siyudad sa Sugbo aron paggukod niadtong mga malapason  sa trapiko.

Dili pa lang dugay ang hunta nipasar og resolution pinaagi nila ni PB Members Sun Shimura ug Joven Mondigo nga nag-awhag sa tanang mga tigpatuman sa balaod nga hingusgan ang ilang kampanya batok niadtong mga masalaypon nga driver.

Labaw nga gihisgutan sa maong resulosyon ang pagdili sa paggamit og celfone samtang nagmaneho,  pagsul-ob og seatbelts ug ang  pagdili sa paggamit ug mga silaw nga headlights panahon sa kagabhion.

Giawhag usab sa hunta ang Cebu Provincial Police Office ug ang nagkadaiyang estasyon sa pulisya sa pagsagop sa mga nahan-ay na nga operasyon batok sa mga malapason sa trapiko.

Usa sa mga kasagarang nakitang kalapasan sa mga driver nga nakaapekto kaayo sa ilang pagpadagan, ang pagganit og celfone samtang nagmaneho sa ilang mga sakyanan.

Sumala pa ni Shimura ang paggamit og celfone samtang nagmaneho ang usa sa mga hinungdan nga dili na mamintar ang insaktong lane position, ang pagmintenar sa jnsaktong gikusgon, pagmintenar sa insaktong gilay-on sa sakyanan nga anaa sa atubangang bahin ug ang kamabinantayon sa balaod trapiko sa kalsada.

Dugang pa ni Shimura nga gikinahanglan usab ang pagkontrolar sa paggamit og mga silaw nga suga panahon sa kagabhion diha sa mga kadalanan.

Bisan pa kung kini makatabang sa mga driver nga mabantayan ang distansya sa mga ngiob nga kadalanan makaapekto usab kini sa panan-aw sa mga driver nga anaa sa pikas nga direksyon.

Napanglantawan usab ni Shimura nga kinahanglan hingusgan ang pagpatuman sa mga awareness campaign. (PIA-CEBU/AS)