LTFRB-7: Enero1 2012 na ipa-uniporme ang mga drayber 

Ni Juju Manubag-Empuerto

CEBU CITY, Sept 9 (PIA) --- Enero 1, 2012 na ipatuman ang pagpa-uniporme sa tanang mga drayber sa mga publikong sakyanan.

Mao kini ang gipahibalo ni Land Transporation, Franchising & Regulatory Board  kon (LTFRB) Regional Director Ahmed Cuizon.

Si Cuizon misulti nga basi sa bag-ong memorandum nga gipagawas sa ilang buhatan nga pasul-ubon na ug mga uniporme ang tanang mga drayber sa mga publikong sakyanan, daghang mga operators mihangyo  nga mga daang uniporme lang una ang panul-ubon nila tungod wala pa kini makusbat ug ang uban dili pa usab makapalit ug bag-o.

Miuyon ug misabot si Cuizon sa maong hangyo nga karaan lang sa nga uniporme ang sul-ubon sa mga drayber kay nakasabot siya hilabina nga sigeng saka ang presyo ron sa gasolina ug sa ubang mga palaliton.

Sa gikataho nahibaw-an ang uniporme sa mga drayber sa mga PUJ mao ang light blue nga polo shirt; sa mga taxi, pula nga polo shirt; sa mga cargo truck, maroon nga polo shirt; sa mga van for hire kay  berde nga polo shirt; sa mga  bus, puti nga polo shirt; sa mga shuttle service, school service ug tourist transport service, dilaw nga polo shirt. 

Sa laing bahin, si Rey Elnar,Transportation Development Officer sa LTFRB nagkanayon nga isumbong sa ilang hotline nga numero (032) 2316221 kadtong mga taxi nga adunay paspas nga mga metro aron kini ilang madakpan.

Sumala ni Elnar nga duna silay nadawat nga mga taho nga dunay mga taxi nga paspas ang mga metro tungod duna kiniy ibutang nga mga kahimanan aron mokusog ang dagan sa ilang metro ug madako ang mabayran sa plitehan sa sumasakay.

Gikinahanglan nga itug-an kini sila sa ilang buhatan aron mahunong ang dautan nga palakaw ug mga laraw ning mga drayber sa taxi.(PIA-Cebu/JSME)

==========

DAR, NGOs mo inagurar sa 19 ka classrooms sa Talisay City

CEBU CITY Septyimbre 9 (PIA) - Ang Cebu Provincial Agrarian Reform Office (PARO) ug ang kaalyado niining mga NGO mi-inugurar sa 19 ka lawak-tunghaan sa Lawaan-1Elementary ug National High School nga nahimutang sa siyudad sa Talisay.

Ang pagkatukod sa maong building resulta sa public-private partnership (PPP) aron pag-alagad sa 1,576 ka tinun-an sa elementary ingon man sa 1,208 nga mga estudyante sa high school sa barangay Lawaan 1 siyudad sa Talisay.

Ang kahumanan sa 19 ka lawak-saringanan maghatag ug desente nga lawak sa kasamtangang 11 ka mga klase nga walay lawak kinsa nagmugna og kadasok sa ubang mga classrooms. 

Gikatahong parte kini sa 5-phase, 120 classroom nga proyekto ubos sa programa sa Community-based Public School Development alang sa integrated elementary ug high school building,diin gisugdan ang organizational nga aspeto pagtukod niini niadtong Enero sa miaging tuig.

 Ang local nga komunidad sama sa mga ginikanan, magtutudlo, ug tinun-an sa Barangay Lawaan;ingon man mga pribadong sektor ug Department of Agrarian Reform (DAR-7) pinaagi sa ilang  PARO-1  Maria Lourdes Mariano uban ni Fr. Ulrich Schlecht, SDV sa Divine Word Missionaries maoy nihatag sa ilang kaalam pagplano sa maong proyekto lakip na usab ang pag-organisar sa komunidad ug ang mobilisasyon sa mga pundo.

Ang naasoy’ng proyekto kolaborasyon sa mga kaalyadong pribadong sektor sama sa Perciles Dakay, Presidente ug General Manager sa Dakay Construction and Development Construction and Development Corporation; Board of Trustees sa University of San Carlos, Fr. Ulrich Schlecht, SVD; miyembro sa ; Divine Word Missionary Congregation –Southern Province, Jeffrey Traya; Presidente sa, Lawaan-I Public Elementary School PTA Inc. Reynold Singco;  Lawaan-I School Principal;  lokal government unit sa Talisay City ug DAR. 

 Lakip sa naasoyng inagurasyon ang pag award og plaques of recognition ngadto sa mga pribadong sector nga kaalyado sa maong proyekto ug isunod gilayon ang usa ka press conference human sa maong kalihukan. (PIA7-CEBU/mbcn/Amor Saludar).