Lakang sa DepEd dako ug matampo sa kaluwasan panahon sa katalagman

By: Amor Saludar

CEBU CITY Septyembre 5 (PIA) – Giila sa Senado ang lakang sa Department of Education (Deped) pagmugna og kaugalingong Disaster Risk Reduction Management Office (DRRMO) nga ipatuman matag publikong tulunghaan sa nasud.

Ang Deped DRRMO ubos sa Deped Order No. 50, ni Education Secretary Armin Luistro gitumong aron mapatik sa hunahuna sa katawhan ang importansya sa pagmatngon sa bisan asang dapit o higayon ingon man pag protiher sa dungog sa edukasyon ug paghatag og kasiguroan sa padayong paghatud ug de kalidad nga serbisyo sa edukasyon.

Matud pa ni Senator Loren Legarda ang  chair sa Senate Committee on Climate Change, ang maong lakang dako kaayo og mamahimong papel sa disaster preparedness, tungod kay obligasyon sa matag tulunghaan nga proteksyonan ang mga tinun-an ug mga personnel niini.

 Dugang  pa sa senadora nga ang matag tulunghaan magsilbi usab nga evacuation centers niadtong mga mabiktima sa katalagman ug nga tungod niini ang DepEd gisangunan sa paggama og mga school buildings nga makasarang panahon sa katalagman.

Matud pa ni Legarda nga ubos usab sa Climate Change Act of 2009 ang DepEd gimandoan sa pagpaapil sa Climate Change sa mga subjects sa elementary ug highschool ug nga dili lamang limitado sa mga subjects nga science, biology, sibika, ug history, laip na usab dinhi ang mga libro, kartilya ug uban pang educational materials.

Pamahayag sa senadora nga ang kahibalo sa disaster preparedness measures importante aron pag siguro nga ang mga estudyante ug magtutudlo makaprotiher sa ilang kaugalingon sa mga peligro sa kinaiyahan.

Naglaum si Legarda nga tungod niini nga lakang ang DepEd mag aghat sa mga tulunghaan nga nahimutang sa high risk areas pag sagop ug pag implementar sa disaster preparedness ug contingency plans aron ang mga tinun-an makasugakod ug makapadayon sa pagtungha taliwala sa katalagman.(PIA-Cebu/mbcn/AS)