DPWH Cebu nilusad og kampanya batok sa mga ‘overloading’ trucks

By: Amor Saludar

CEBU CITY, Agosto 23 (PIA) -- Ang Department of Public Works and Highways (DPWH) nilusad og kampanya pag kontrolar sa mga overloading nga trucks ug trailers nga moagi sa mga nasudnong dalan.

Gisugdan kini pinaagi sa usa ka caravan kagahapon nga giapilan sa DPWH, Land Transportation Office (LTO) ingon man ang Philippine National  Police (PNP)  nga nanukad gikan sa Talisay City hangtod sa Carcar City, o mga lugar nga nalakip sa unang distrito sa habagatang bahin sa Sugbo.

Dungan usab niini ang pagpanghatag og handouts ug leaflets kabahin ning maong operasyon ingon man ang mga silot.

Kini gituyo aron pagdili niadtong mga truck ug trailers nga nag karga og lapas sa gilatid nga 13,500 kilogram nga moagi sa mga nasudnong dalan ug mga taytayan aron mapreserbar kini nga mga inprastraktura ug malikayan usab ang aksidente sa kadalanan.

Gisugdan kini sa mga syudad ug munisipyo nga nasakop sa unang distrito sa habagatang bahin sa Sugbo o kadtong mga dapit nga moagi sa Tunghaan bridge sa Minglanilla, ang usa sa pinaka karaang taytayan sa probinsya nga mamahimong agianan sa tanang klase sa sakyanan.

Ang mga dapit nga nahisakop sa unang distrito adunay nakapwesto nga duha ka sakop sa PNP nga maoy mosuta sa mga  truck ug trailer nga moagi sa lugar.

Kadtong masakpang nagkarga og subra sa katunga sa gilatid nga timbang isyuhan og Temporary Operation Permit (TOP). 

Sumala pa ni Daisy Toledo sa Cebu 2^nd Engineering sa interbyo sa radio nga ang pagpatuman niini gisugdan lang sa unang distrito sa habagatan apan kini ipatuman gayod sa tibook probinsya tungod kay kini mando sa kaulohan ug kinahanglang ipatuman tibook nasud. 

Dugang pa niya nga kong kini hingpit nga mapatuman makatabang gayod kini pag preserbar sa mga nasudnong kadalanan ug mga taytayan ingon man makakunhod usab sa mga aksidente sa kadalanan.

Sa laing bahin giawhag usab ni Toledo ang mga operator og truck pagsunod sa kapasidad nga makarga base sa disenyo sa ilang trailer kay kini makatabang usab sa DPWH pag desisyon kong ang disenyo sa usa ka inprastraktura kinahanglan ilisan o pun-an. (PIA- CEBU/AS)