Mga PIOs sa Sugbo gituki ang problema sa cyber pornography ug human trafficking 
 Ni: Amor Saludar

CEBU CITY, Agosto 22 (PIA) -- Nipahigayon og panagtapok ang CebuAssociation of City and Municipal Public Information Officers (CAOCAMPIO) ngadto sa Cebu City Hall sa di pa lang dugay ug gituki nila ang problema sa cyber pornography ug human trafficking diri sa Sugbo.

Ang maong panagtigum gituyo aron matuki ang  mga kaso sa probinsya sa Sugbo nga naglambigit sa mga menor de edad  ug mga kababayen-an.

Usa sa gihisgotan sa maong panagtapok ang kabahin sa prolema sa nagkataas karon nga kaso sa cyber sex diin sagad nga nalambigit niini mga menor de edad nga babaye ug lalaki.

Matud pa ni Cebu Provincial Police Office Director, S/Supt. Patrocinio Comendador, usa sa nahimong rason sa nagkataas nga kaso sa Cyber Sex mao ang pagdagsang usab sa mga internet cafe ug ang kahanas na sa mga tawo pag gamit sa internet.

Laing napanglantawang rason mao nga ang probinsya sa Sugbo ang sagad dugokon sa mga turista ug tungod niini nikatap usab ang prostitusyon ug child trafficking.

Sa kasamtangan ang Pilipinas nahimutang sa ika upat nga puwesto sa mga nasud sa silangang asya nga gikatahong mga menor de edad ang nalambigit sa Cyber sex ug Human trafficking. 

Apan bisan pa niini giklaro ni Comendador nga  dili kini angay’ng kabalak-an tungod kay nidaghan lamang ang maong insedente gumikan sa publisidad nga maoy naghatag og impresyon ngadto sa katawhan. 

Dugang pa niya nga ang grupo sa mga kapolisan sa probinsya nakigtambayayong na usab sa ubang mga organisasyon aron pagsumpo niining maong klase sa illegal nga kalihukan.

Gawas usab niini nakitang mamahimong solusyon ni Comendador niini mao ang pagpakabana sa mga ahensya sa gobyerno, mga opisyales sa barangay, mga ginikanan ug ang tibook komunidad, pagpakatap sa mga impormasyon unsaon pagsumpo niining maong kalihukan. (PIA- CEBU/AS)