Mobile surgical team mipahigayon sa ikaduhang surgical mission ngadto sa lungsod sa Bindoy

DUMAGUETE CITY, August 18 (PIA) -- Ang Mobile Surgical Team nga bag-o lang giumol niining tuiga pinaagi sa pagpaningkamot ni Negros Oriental Gov. Roel Degamo mipahigayon ug usa ka surgical mission didto sa lungsod sa Bundoy sugod karong adlawa hangtod karong Agosto 19, 2011.

Ang maong grupo gikatakdang mopahigayon ug lain-laing mga surgical ug medical services ngadto sa Bindoy Ditrict hospital sulod sa tulo ka adlaw nga programa niini.

Kini matud pa ang ikaduhang surgical mission nga gipahigayon sa grupo human kini gilunsad sa probinsya niadtong buwan sa Abril ning tuiga didto sa lungsod sa Siaton.

Matud ni Capitol Information Officer Adrian Sedillo, kining maong mission naglangkob sa mga major ug minor operations sama sa appendectomy, circumcision ug laing pang mga dental services sama sa pagpaibot ug ngipon.

Dugang usab nga serbisyo nga gitagana mao ang libreng body massage ug pagpatupi.

Molangkob usab sa maong kalihokan ang mga miyembro sa  Members of the Philippine Academy of Medical Specialists (PAMS) ug the Association of Cebu Eye Specialists (ACES) kung diin andam silang mopahigayon sa susamang mga serbisyo lakip na usab kadtong mga problema kalabot sa mata.

Si Gov. Degamo maoy gituohang nangulo sa maong surgical team nga gilangkoban sa mga medical personnel gikan sa Negros Oriental Provincial Hospital (NOPH), chiefs of hospitals ug Rural Healthy Units.

Ang maong Mobile Surgical Mission usa sa mga nag-unang kalihokan sa probinsya ubos sa programa ni Gov. Degamo kalabot sa pagpromot sa HELP o Health, Education, Livelihood Programs and Projects for peace and development. (PIA-7/mbcn/Maryknoll B. Lague)