US credit downgrade way dakung epekto sa ekonomiya sa nasud, suma sa NEDA Ni Eli C. Dalumpines CEBU CITY, Agosto 12 (PIA) -- Way dakung epekto sa atong ekonomiya ang pag-downgrade sa credit rating sa Estados Unidos sukwahi sa pagtuo sa kadaghanan. Kini ang gi-klaro sa Director-General sa National Economic and Development Authority (NEDA) Cayetano W. Paderanga, Jr. sa pakighinabi sa media kagahapon atol sa gipahigayon nga caravan sa Philippine Development Plan (PDP) dinhi sa Sugbo. Matud ni Paderanga, gawas sa gamay nga impak sa interest rate, usa lang ka bahin sa uno porsyento sa kinatibuk-ang tinuig nga pagtubo sa ekonomiya ang mahimong epekto niini. Iyang gitataw nga di kini pareho sa economic meltdown nga nasinati sa Estados Unidos ang Uropa sa 2008 diin miigo gyud kini sa export business sa Pilipinas. Mahimong isyu hinoon niini, suma pa niya, kung unsa na’y mahitabo sa dolyar isip global currency, kung ilisan ba kini ug lain. Apan iyang gidugang nga molanat ug taas nga panahon ang pag-ilis sa global currency. Si Paderanga mianhi sa Sugbo uban sa mga opisyal sa NEDA aron ipahibawo sa publiko ang PDP nga maoy mahimong roadmap sa administrasyong Aquino sa mosunod lima ka tuig. Tumong niini nga maapil sa paglambo ang mga kabus nga hut-ong sa katilingban pinaagi sa paghatag kanila ug trabaho ingon man paghatag ug higayon sa ilang mga kabataan nga maka-eskwela ug hingpit nga makasud sa workforce. (PIA-Cebu/ECD)