PDP makapakunhod sa kawad-on, matud sa labaw’ng opisyal sa NEDA
Ni Eli C. Dalumpines

CEBU CITY, Agosto 12 (PIA) -- Daku ug ikatabang ang Philippine Development Plan (PDP) pagpakunhod sa kawad-on dinhi sa nasud, matud sa Director-General sa National Economic and Development Authority (NEDA) Cayetano Paderanga, Jr. 

Si Paderanga, atol sa pakighinabi sa media kagahapon, nagkanayun nga tumong sa PDP mao ang “inclusive growth” diin uban usab sa pag-angat sa kahimtang sa ekonomiya ang mga kabus ugdili lang kay ang naa sa taas nga hut-ong sa katilingban.

Kini sukwahi sa “trickle down growth” nga gipatuman sa nanglabay’ng katuigan nga wa gyud maka-angat sa kahimtang sa mga kabus tungod kay wa man kini mohatag ug trabaho, suma ni Paderanga.

Ang PDP maoy ekonomikanhong ‘roadmap” sa administrasyon ni Presidente Benigno S. Aquino III nga ipatuman sud sa unom ka tuig nga pamunu-an niini.Matud ni Paderanga, subay kini sa”Social Contract” ni Presidente Aquino tali sa mga Pilipinhon. Nagsubay kining maong plano sa pagpatuman sa maayong pamunu-an pinaagi sa pagpakigbatok sa korapsyon.

Ang kagamhanan, ubos niini nga plano, maninguha nga maka-abot ug 7-8 porsyento nga paglambo sa ekonomiya aron makahatag kini’g daghan nga trabaho, nagkanayun ang opisyal.

Subay kini sa tinguha sa kagamhanan nga kunhuran ang antas sa ka-kabus sa nasud gikan sa 33.1 porsyento sa 1991 ngadto sa 16.6 porsyento pag-abot sa 2016.

Gi-klaro ni Paderanga nga na-umol ang maong plano sud sa pipila ka buwan nga konsultasyon sa nagkalain-laing mga sektor apil na ang mga local nga mga pangagamhanan, academe, civil society ug pribadong sektor. (PIA-Cebu/ECD)

===========

Publiko giawhag nga magpakunsulta kung dunay nasinating simtomas sa TB
Ni Eli C. Dalumpines

CEBU CITY, Agosto 11 (PIA) – Giawhag sa mga opisyal sa Department of Health (DOH) dinhi sa rehiyon 7 kadtong dunay nasinati nga simtomas sa Tuberculosis, kun TB, nga mopa-hiling dayon sa mga pampublikong mga tambalanan aron masuta kung duna ba gyud sila niini nga balatian.  

Ang Clinical Head sa DOH TB Treatment Center of the South, Dr. Sharon Laurel, atol sa bagong gipahigayon nga media forum, nagkanayun nga nagpadayon pa ang abag sa gobyerno nga mga tambal alang niadtong naghambin niini nga sakit.

Tungod niini, di angayan nga magpanuko ang publiko pagduol sa mga tambalanan aron aron magpahiling kay duna pa may libring mga tambal alang niini ang ilang buhatan, suma ni Laurel.

Gitataw ni Laurel nga naggahin ang DOH ug P50 ngadto sa P70 milyones alang sa mga medisina sa TB. Kini sa tuyo nga mapapas gyud ang maong sakit dinhi sa nasud.

Matud niya, dunay gamay nga pagsaka sa mga kaso sa TB sa nasud taliwa sa paninguha sa gobyerno pagsumpo niini.

Ang nakapa-alarma hinoon kanila mao ang pagsaka usab sa virulent strain, kun matang sa TB virus nga mosukol sa medisina nga kasagarang tumaron sa naghambin sa maong sakit, dugang pa niya.

Apan matud niya, duna na sila’y gihimo nga pakigtambayayong sa mga pribadong institusyon aron masanta ang pagkatap sa maong sakit.

Ang TB, suma pa, maoy ika-pito nga hinungdan sa kamatayon sa mga Pilipino dinhi sa nasud. (PIA-Cebu/ECD)