DOH-7 nakigtambayayong sa mga pribadong

institusyon aron pag-alkontra sa sakit nga TB
Ni: Amor Saludar

CEBU CITY, Agosto 11 (PIA) -- Nipasalig ang Department of Health (DOH) sa Tunga-Tungang Kabisay-an sa publiko nga mas may katakos na ang ilang ahensya pag-pakigbatok sa sakit nga TB dinhi sa rehiyon.

Atol sa Kapihan sa PIA karong buntag,  gibahibalo ni Jocelyn Tabo-tabo, Nurse Coordinator sa National TB Treatment sa DOH-7 ang mga sakop  sa medya sa ilang pakigtambayayong sa mga pribadong tunghaan, tambalanan ug ingon man mga pribadong ahensya aron maalkontrahan ang pagkuyanap sa sakit nga TB sa nasud.

Dugang pa niya nga sa kasamtangan aduna na’y naka-montar nga mga DOH Center sa ubang pribadong mga tambalanan aron pag-abag nga mominos ang gastohan sa mga pasyenteng nasakit og TB sa maong mga tambalanan.

Matud pa usab ni Tabo-tabo nga sa pagka-karon nagsugod na sila pag-pahigayon og mga seminars ingon man orientation sa mga tinun-an ug magtutudlo sa ubang pribadong tunghaan ug ahensya kabahin sa sakit nga TB, unsaon paglikay niini ug ang mga angay’ng buhaton kun duna niining maong balatian.

Giangkon niya nga tungod ning maong adbokasiya ug sa suporta sa gobyerno, mas nitaas ang kahibalo sa mga tawo kabahin sa sakit nga TB diin  mas  motaas na unya ang kahigayonan nga malikayan kining maong sakit sa publiko.

Matud niya, 50-70 bilyones ka pesos ang gigahing salapi sa gobyerno alang sa adbokasiya sa DOH batok sa sakit nga TB ug sa medikasyon sa mga tawong natakbuyan ning maong balatian.

Subay niini  nitaas ngadto sa 8 porsiyento ang kalampusan sa DOH dinhi sa rehiyon sa pagluwas sa mga tawong natakboyan sa sakit nga TB ingon man pagsumpo ning maong balatian.

Sa mao gihapong panagtapok giawhag ni Dr. Sharon Laurel, Clinical Head sa DOH Treatment of the South nga naka-base sa Eversely Child Sanitarium, ang katawhan nga naghambing sa sakit nga TB nga dili magmakuli pagdangop sa ilang buhatan aron sila maatiman ug mahatagan  gilayonon og igong atensyon.

Gibahibalo sa DOH ang publiko nga angay magmatngon sa sakit nga TB ug modangop gilayon sa ilang buhatan kun ugaling may namatikdan silang kausaban sa ilang panglawas tungod kay base sa talaan sa DOH padayon nga nitaas ang kaso sa sakit nga TB sa rehiyon 7. (PIA-Cebu)

=============

Sertipikasyon nagmatuod nga usa ka luwas nga tugpahan ang MCIAA

Ni: Amor  Saludar

CEBU CITY, Agosto 10 (PIA) - Approbado sa Civil Aviation Authority of the Philippines (CAAP) ang aplikasyon sa Mactan Cebu International Airport Authority (MCIAA) alang sa Aerodrome Cerification sa ilang Safety Management System. 

Sa gipahigayon nga forum inabagan sa Association of Government Information Officers (AGIO-7) gibutyag ni MCIAA General Manager and Chief Executive Officer Nigel Paul Villarete sa mga sakop sa media nga nadawat sa mga airline operators sa MCIAA ang maong sertipikasyon niadtong Hulyo 29,2011.

Matud pa ni Villarete nga human sa ilang aplikasyon Enero sa miaging tuig ang CAAP mipahigayon gilayon og  sunod-sunood nga pakisusi kung nasunod ba sa MCIAA ang standards nga gitakda sa Aviation Safety Manual pinaagi sa pagbaton og mga kahimanan ug ekipto, ingon man ang pagpatuman og mga operating procedures alang sa kaluwasan sa mga pasahero sa maong tugpahanan.

Nagkanayon  siya nga usa usab sa gikonsiderar sa CAAP mao ang ilang Aerodrome Manual nga gisubay sa aviation regulation ug ang katakos sa mga kawani sa MCIAA sa pagpatuman ug pagmintenar sa ilang Safety Management System.

Giklaro ni Villarete nga ang maong pasidungog dili lang alang sa MCIAA kun dili alang sa kinatibuk-ang aviation industry sa Pilipinas, tungod kay gikinahanglan ang tanang airport magbaton niining maong sertipikasyon.

Dugang pa niya nagkinahanglan pa og usa ka certificate ang MCIAA aron mausbawan ang ilang mga international flights ug malikayan ang pagka blacklisted didto sa mga nasud nga sakop nga European Union.

Sa kasamtangan ang MCIAA nagpahigayon og pagbansay bansay sa kapin 160 ka mga stakeholders aron pagsiguro sa publiko nga magpadayon unya ang  pagpatuman sa Safety Management System sa maong tugpahanan.

Aron sa pagbalanse sa naasoy nga Safety Standard ang MCIAA nag pahigayon usab og proyekto aron sa pagpalapad sa ilang domestic ug international nga terminal alang sa kahamugaway sa publiko.

Ang maong proyekto gikatakda unya nga makompleto Disyembre ning tuiga sigon sa plano, pamahayag in Villarete. (PIA-Cebu/AS)