Rehiyon 7 may pinaka-daghang ningpasar sa skills competency test

Ni Eli C. Dalumpines

CEBU CITY, Agosto 16 (PIA) -- Nakatala ug pinakataas nga passing rate ang Tunga-Tungang Kabisay-an sa unang hugna sa National Competency Assessment and Certification (NATCAC) nga gipahigayon sa milabay’ng Marso 27 ngadto sa Abril 1 karong tuiga.

Kini ang pamahayag ni Jing Jaime, hepe sa Assessment and Certification Unit sa Technical Education and Skills Development Authority (TESDA) sa Rehiyon 7, atol sa pakighinabi sa radyo karong buntag. Matud ni Jaime, 84 porsyento sa 2,500 nga ningkuha ug pasulit dinhi sa rehiyon ang ningpasar, pinakataas sa tibook nasud.

Hinoon naka-desisyon ang ilang buhatan nga lugwayan na ang ipahigayong competency test tungod kay dili igo, suma pa niya, ang usa ra ka semana alang sa daghang mokuha sa pasulit sa tibook rehiyon.

Ang ika-tulo nga hugna ipahigayon na karong buwana hangtud na kini sa Nobyembre 4 ug i-basi na kini sa matag sektor, gitataw sa opisyal.Iyang giaghat ang mga trabahante sa magkalain-laing sektor sama sa kostruksyon, agrikultural, tourism, panahi ug sa transport nga moadto lang sa ilang buhatan aron magpakigsayod.

Gipasalig ni Jaime nga libre ang maong pasulit ug bukas kini alang niadtong gusto mokuha ug National Certification (NC) aron ilang magamit sa pag-apply ug trabaho sa local man o sa gawas sa nasud. (ECD/PIA 7-Cebu)